एनआईसी एसिया बैंकले सन २०२० सम्ममा तीन सय शाखा संजाल र एक हजार भन्दा बढी एटिएम संख्या पुर्याउने रणनीति सार्वजनिक गरेको छ। बैंकले १९ बर्ष पुरा गरी २० औ बर्षमा प्रवेश गरेको अवसरमा बैंकका प्रमुख कार्यकारी अधिकृत लक्ष्मण रिसालले ३ बर्ष अगाडिनै यसप्रकारको दिर्घकालीन रणनिती तयार गरेको जानकारी दिए।
बैंक सञ्चालक समितिका अध्यक्ष जगदिश प्रसाद अग्रवालले बैंकले १९ कर्मचारी १ शाखा र ८ करोड चुक्ता पुंजी सहित एक क्षेत्रीय बाणिज्य बैंकको रुपमा नेपालको बैंकिङ क्षेत्रमा नेपाल नेपाल इन्डष्ट्रियल एण्ड कर्मशयिल बैंकको रुपमा संचालनमा आएको जानकारी गराए। त्यो बेला बैंकले गरेको प्राथमिक शेयर निष्काशनमा ८ गुणा वढि सेयरको लागी आवेदन प्राप्त गरेको बताउदै अध्यक्ष अग्रवालले स्थापना कालमा प्रति कित्ता १०० का दरले १ साधारण शेयरमा लगानीगर्ने शेयरधनीले लगानीबाट हालको बजार मुल्य अनुसार तीन हजार चार सय नब्बे रुपैयाँ मुनाफा हुने अवस्था रहेको बताए ।
हाल बैंकले १२५ भन्दा बढि शाखा तथा एक्स्टेन्सन काउन्टरबाट सेवा प्रदान गरिरहेको छ। यस अवधिमा बैंकका निक्षेप ग्राहक संख्या ५ लाख ५० हजार बढी तथा कर्जा ग्राहक संख्या २५ हजार बढी रहेको बैंकले जानकारी दिएको छ। साथै डिजिटल बैंकिङ सेवा लिने ग्राहक २ लाख ५० हजार बढी पुगेको जनाइएको छ।
त्यस्तै बैंक स्थापनाकाल देखि आजसम्म अन्तर्राष्ट्रिय स्तरको ख्याति प्राप्त बैंक अफ द इयर २००७, बैंक अफ द इयर २०१३ अवार्डबाट सम्मानित भएको बताइएको छ। सो अवसरमा बैंकले टेलिभिजनको विज्ञापन समेत सार्वजनिक गरेको छ।