कान्छो बाणिज्य बैंकको रुपमा रहेको सेन्चुरी कमर्शियल बैंकले नयाँ सीईओ पाएको छ । बैंकले तुलसीराम गौतमलाई सीईओ चयन गरेको हो । गौतमलाई आगामी बैशाख १९ गतेदेखि लागु हुने गरी सीईओ तोकिएको बैंकले जनाएको छ ।
गौतम ३ महिना अघि मात्र इक्रा नेपाल लिमिटेडको प्रमुख कार्यकारी अधिकृतमा नियुक्त भएका थिए । त्यस अघि भने उनी माछापुच्छ्रे बैंकको सीईओ थिए । माछापुच्छ्रे आउनु अघि गौतम नेपाल एसबिआइका प्रमुख क्रेडिट अफिसर थिए । ३० वर्षअघि नेपाल बैंकबाट सेवा सुरु गरेका उनले तत्कालिन नेपाल इन्डोसेज बैंक छाडेर एसबिआइ गएका हुन् । एसबिआइमा उनी १० बर्ष सम्म रहे ।
अर्थशास्त्रमा स्नातक गौतम मार्केटिङ र फाइनान्समा एमबीएसमेत गरेका छन् । करिब ३६ वर्ष बैकिङ क्षेत्रमा बिताएका गौतमसँग जोखिम विश्लेषण र कर्जा लगानीमा राम्रो दख्खल छ ।
सेञ्चुरी बैंकले यसअघि अनिल केशरी साहलाई सीइओ बनाउने निर्णय गरेको थियो । तर तलबमा कुरा नमिलेपछि साह सेन्चुरी छाडेर नबिल बैंकमा गएका छन् ।
