एनआईसी एशिया बैंक NIC Asia Bank Limited ले नेपालको बैंकिङ क्षेत्र मै पहिलो पटक अनलाईनबाटै चेक भौचर भर्न सकिने सुविधा ल्याएको छ । बैंकले बैंकमा चेक जम्मा गर्नु अगाडी भर्नु पर्ने भौचर अनलाईनबाटै भर्न सकिने सेव को सुरुवात गरेको हो ।
यसको लागि बैंकले छुट्टै वेबसाइट तयार गरेको छ । उक्त वेबसाइट मार्फत ग्राहकले भौतिक फारमकै ढाँचाको डिजिटल भौचर भर्न सक्ने र उक्त भौचरमा आफुलाई पायक पर्ने शाखा छनौट गर्नु पर्ने बैंकले जनाएको छ । डिजिटल भौचर भरेपछि बैंकले एसएमएस मार्फत डिपोजिट कोड दिने र उक्त कोड बैंकको काउन्टरमा रहेका कर्मचारीलाई जानकारी दिनु पर्ने बैंकले जनाएको छ । त्यसपछि ग्राहकले बैंकमा लाइन नबसी आफुले जम्मा गर्नु पर्ने चेक दिई पैसा जम्मा गरेर भौचर लिन सकिने बैंकले जनाएको छ ।
चेक जम्मा गर्ने सेवाको अलावा बैंकले मोबाइल बैंकिङ्ग सेवा नवीकरण, अनब्लक, ब्लक, तथा पिन रिसेट गर्ने एवं मौदात विवरण, चेक अनुरोध, ई–कमर्श दर्ता, ब्यालेन्स सर्टिफिकेट अनुरोध, एबीबीएस सुविधा र स्टेटमेन्ट अनुरोध गर्नका लागि समेत अनलाईनबाटै गर्न सकिने बैंकले जनाएको छ ।
बैंकले ३२६ शाखा, ४६७ एटिएम, १०३ वटा एक्स्टेन्सन काउण्टर एवं ६४ वटा शाखा रहित बैंकिङ्गमार्फत् बैंकिङ्ग सेवा प्रदान गर्दै आइरहेको छ ।
