डोजर र स्काभेटरले मजदुर बिस्थापित

बिजपाटी संवाददाता

बिजपाटी संवाददाता

Feb 15, 2019 | 01:10:36 PM मा प्रकाशित

laxmi  sunrise bank

डोटीको स्थानीय तहले डोजर र स्काभेटर प्रयोग गरि सडक निर्माण गर्दा स्थानीयमजदुर रोजगारीबाट बिस्थापित भएका छन् ।  स्थानीयस्तरमै रोजगारी सिर्जना गर्ने हिसाबले उपभोक्ता समितिको अवधारणा आए पनि स्थानीय तहले मेसिन प्रयोग गरेर सडक निर्माण गरिरहेको स्थानीयवासीको आरोप छ ।

गाउँमा हुने विकास निर्माणमा मेसिन मात्रै प्रयोग हुन थालेपछि डोटीका ग्रामीण क्षेत्रका स्थानीयवासी रोजगारीका लागि छिमेकी मुलुक भारत जान बाध्य भएको जोरायल गाउँपालिका–५ निरौलकी स्थानीय चित्रराज भट्ट बताउछन् । उनले भने, “सडक निर्माण हुने ठाउँमा मेसिन प्रयोग हुँदैछन्, मजदुरले काम पाउँदैनन्, काम नपाएपछि कमाउन त भारत पस्नै पर्यो ।” पुरुषजति रोजगारीको खोजीमा भारत गएपछि गाउँमा महिला, वृद्धवृद्धा तथा बालबालिका मात्रै रहेको वोगटान गाउँपालिका–१ का कमलसिंह बम बताउछन् । उनका अनुसार, सडक निर्माणजस्ता ठूला योजनामा मेसिन प्रयोग हुन थालेपछि पुरुषजति काम खोज्न भारत जानबाध्य छन्, गाउँ भने युवाविहीन  बनेको छ । 

एक करोडसम्मका निर्माणकार्य उपभोक्ता समितिमार्फत गर्न पाउने प्रावधान भए पनि यहाँका ग्रामीण क्षेत्रमा हुने विकास निर्माणमा मेसिन हावी भएका छन् । उपभोक्ता समितिले पनि डोजरकै प्रयोग गरेको पाइएको जोरायल गाउँपालिका–५ का स्थानीय दीर्घबहादुर बोगटी बताउछन् । 

उनले भने, “उपभोक्ता समितिले पनि डोजर नै प्रयोग गर्न थालेका छन्, मजदुर विस्थापित छन् ।” मेसिनको प्रयोग हटाएर स्थानीय मजदुरलाई नै काम दिएको खण्डमा यहाँका युवा तथा मजदुरहरु विस्थापित नहुने स्थानीयवासीको भनाइ छ । यहाँका स्थानीयवासी कामका लागि वर्षेनी भारतका विभिन्न शहर पञ्जाब, बरेली, लुधियाना, बैङ्लोर, दिल्ली, उत्तराखण्ड, कुमाउ, गडवाल जाने गर्दछन् । 


Share Your Thoughts

Recent News

Main News

Close in 7


Bizpati.com © 2020. All Rights Reserved