स्वतन्त्र उर्जा उत्पादक संघ इपानले सरकारले १ खर्ब २५ अर्बको लगानी गरिसकेको नीति क्षेत्रलाई नसमेटी बजेट ल्याएको बताएको छ । संघका अध्यक्ष शैलेन्द्र गुरागाईले सवा खर्ब लगानी गरेको निजि क्षेत्रको सुझावलाई नसमेटी सरकारले बजेट ल्याएको बताएका हुन।
नेपाल बिद्युत प्राधिकरणको भन्दा बढी बिजुली राष्ट्रिय ग्रिडमा जोड्ने क्षेत्रलाई सरकारले बाईपास गरेर बजेट ल्याएको उनले बताए । अहिलेको अवस्थामा ३ वटा आयोजनाले मात्र बैंकको किस्ता तिर्न सकेको र बाँकिले किस्ता समेत तिर्न नसकेको अवस्थामा बजेट मार्फत आफुले केहि न केहि सहुलियतको अपेक्षा गरेको उनले बताए । उनले भने ' ९ प्रतिशत भन्दा बढी ब्याज तिर्नु नपर्ने ब्यबस्था गर्न हामीले सुझाव दिएका थियौ, त्यस बारे केहि पनि आएँन '।
बजेटमा आफुहरुको लागि सकारात्मक शब्द खर्च गर्न पनि कन्जुस्याइँ गरेको उनले बताए । उनले भने 'निजि क्षेत्रले ६ सय मेगावाट जोडेको छ भनेर धन्यवाद मात्र भनिदिएको भए पनि खुसी हुने केहि ठाउँ रहन्थ्यो ' । उनका अनुसार निजि क्षेत्रले ७ खर्ब लगानीका आयोजनाहरु अगाडी बढाएको अवस्थामा तिनीहरुलाई सम्पन्न गर्न पनि केहि योजना आएन । उनी प्रश्न गर्छन '१५ हजार भन्दा बढी मेगावाटको अध्ययन सकेर निर्माणमा जान इच्छुक निजि क्षेत्रको बारेमा केहि नबोल्नु, निजि क्षेत्रले नेपालमा उत्पादन गरेको बिजुली नचिन्नु बजेट बनाउनेको दृष्टि दोष मात्रै हो कि नियत नै परनिर्भर (भारतको भर) बन्न खोजेको स्तो देखियो, के सधैं अरुमाथि निर्भर बनि राख्ने हो ? '