उर्जा जलस्रोत तथा सिचाई मन्त्री बर्षमान पुनले निजि क्षेत्रले उत्पादन गरेको सबै बिद्युत सरकारले खरिद गर्ने प्रतिबद्धता जनाएका छन् ।नेपाल बिद्युत प्राधिकरणको ३४ औ वार्षिकोत्सव समारोहलाई सम्बोधन गर्दै मन्त्री पुनले सबै बिजुली नेपाल विद्युत प्राधिकरणले किन्ने भएकोले ढुक्क भएर जलविद्युतमा लगानी गर्न निजि क्षेत्रलाई आग्रह गरेका हुन् ।
प्राधिकरणका अध्यक्ष समेत रहेका मन्त्री पुनले लाईसेन्स दिईसकेपछि उत्पादन भएको बिजुली समेत किन्ने दायित्व सरकार कै भएकोले यसबाट पछाडी नहट्ने बताएका हुन् । उनले निजि क्षेत्रलाई सक्दो लगानी गर्न र विजुली उत्पादन भईसकेपछि सरकार कै नीतिको कारण बिक्रि गर्न समस्या नहुने बताएका हुन् ।
हाल रन अफ द रिभर परियोजनाको खरिद बिक्रि सम्झौता नै हुन् छाडेको सन्दर्भमा उनले भने 'रन अफ द रिभरको हकमा कोटा पुरा भएका कारण केहि समस्या देखिएका छन्, यसलाई सरकारले सम्बोधन गर्छ, निजि क्षेत्रले जति बिजुली उत्पादन गरेपनि प्राधिकरणले किन्छ' । उनले स्वतन्त्र उर्जा उत्पादन संघका अध्यक्षलाई यो खबर आफ्ना सबै सदस्यहरु माझ पुर्याईदुन समेत आग्रह गरे ।
उनले देश मै खपत बढाउने सरकारको लक्ष्य भएको र छिमेकि बजारमा समेत इनर्जी बैंकिंङको अवधारणा अनुसार अन्तरिक माग पुरा भएपछि निर्यात गरिने बताए ।
उनले उर्जा मन्त्रालयलाई उत्कृष्ट मन्त्रालय बनाउने र बिद्युत प्राधिकरणलाई संस्थान मध्ये कै उत्कृष्ट संन्स्थान बनाउने घोषणा समेत व्यक्त गरे । कार्यक्रममा मन्त्री पुनले प्राधिकरणका कार्यकारी निर्देशक कुलमान घिसिङको नेतृत्वको प्रशंशा समेत गरे ।