कोरोना महामारीको कारण त्रिशुली जल विद्युत कम्पनीले निर्माण गरिरहेको अपर त्रिशुली थ्री बि आयोजनाको काम प्रभावित भएको छ । कोरोना महामारीका कारण चिनियाँ कामदार नआउँदा र आवश्यक उपकरण नाका मै रोकिंदा आयोजनाको काम प्रभावित भएको हो ।
कम्पनीका प्रबन्ध निर्देशक मोहन प्रसाद गौतमका अनुसार गत जनवरीसम्म कम्पनीको काम लक्ष्य अनुसार नै भएपनि त्यसपछि अपेक्षा अनुसार काम हुन सकेको छैन । मध्य जनवरीमा आयोजनामा कार्यरत चिनियाँ कामदार नयाँ वर्ष मनाउन गएको र त्यसपछि कोरोना महामारी बढेपछि उनीहरु अझै नफर्किएको प्रबन्ध निर्देशक गौतमले बताए ।
उनका अनुसार आयोजनामा अधिकांश चिनियाँ कामदार नै छन् । उनीहरु नहुँदा आयोजनाको मुख्य काम रोकिएको हो । अवस्था केहि सहज बन्दै गएको र अब चिनियाँ कामदारहरु कोरोनाको खोप लगाएर आउने गौतमले बताए ।
प्रबन्ध निर्देशक गौतमका अनुसार आयोजनालाई आवश्यक पर्ने उपकरण केरुङ नाकामा अड्किएर पनि समस्या भएको छ । उनका अनुसार ८-९ महिना अगाडी केरुङ नाका आएका जेनेरेटर लगायतका उपकरणहरु अझै नाका मै अड्किएका छन् । त्यस नाकाबाट खाद्यान्न लगायतका समान छुटेपनि उपकरण छुट्न नसकेको र ति समान छुटाउन पहल भईरहेको उनले बताए । उनका अनुसार अन्य हाइड्रो कम्पनीका उपकरण पनि नाकामा अड्किएका छन् ।
सुरुङको काम आधा पुरा
उनका अनुसार सुरुङ निर्माणको आधा सकिएको छ । आयोजनाको कुल सुरुङको लम्बाई ३ हजार ८ सय ५ मिटर रहेकोमा ४७ प्रतिशत सुरुङ खनिएको छ । प्रबन्ध निर्देशक गौतमका अनुसार कामदार हुँदा ४ स्थानबाट सुरुङ खन्ने कार्य हुने गरेको थियो । सोहि गतिमा सुरुङ खन्ने कार्य जारी रहेको भए अहिले सुरुङको कार्य सकिएको हुने उनी बताउछन् । कोभिड प्रभावले आयोजना सम्पन्न हुने मिति १ वर्ष जति पर धकलिने उनको भनाई छ ।
उनका अनुसार आयोजनाको ४५ प्रतिशत काम सकिएको छ । चिनियाँ कामदार आएर काम सुरु गरेको ५ देखि ६ महिनामा आयोजनाको आधा काम पुराहुने उनको भनाई छ । हाल आयोजनामा ७० जना चिनियाँ कामदार आवद्द छन् ।
यो आयोजना नेपाल सरकारको जनताको जलविद्युत आयोजना अन्तर्गत निर्माण भईरहेको हो । कम्पनीले यस अघि नै सर्वसाधारणलाई १० प्रतिशत अर्थात प्रति कित्ता १० रुपैयाँको दरले आईपिओ निष्काशन गरि सकेको छ । बाँकि ९० प्रतिशत आईपिओ अर्थात प्रति कित्ता बाँकि ९० रुपैयाँ निष्काशन गर्न आयोजनाको ५० प्रतिशत काम सकिएको हुनु पर्ने प्रावधान छ । अब नियमित रुपमा काम सुरु भएको ६ महिनामा सो बराबरको आयोजना प्रगति हुने र बाँकि आईपिओ निष्काशन हुने उनले बताए ।
हाल वर्षाको समय रहेकोले आयोजनामा खासै काम हुन नसकेको उनले बताए । यद्यपि संस्थागत सामाजिक उत्तरदायित्व अन्तर्गत आयोजना प्रभावित वस्तीमा काम जारी राखिएको उनले बताए । उनले भने 'प्रभावित वस्तीमा पहिरोको जोखिम न्यूनीकरण गर्न पर्खाल लगाउने, बाढी पहिरोको पुर्व जानकारी दिने प्रणाली जडान गर्ने कार्य भईरहको छ' ।
कम्पनीले त्रिशुली नदीमा ३७ मेगावाटको आयोजना बनाईरहको छ । आयोजनाको संरचनाहरु नुवाकोट र रसुवा जिल्लामा रहने छ । यो आयोजना ६० मेगावाट क्षमताको अपर त्रिशुली थ्री ए आयोजनाको क्यासकेड आयोजना हो ।
