गायिका मेनुका राई सांगीतिक कोशेली ‘लाईफ’ लिएर श्रोता तथा दर्शकमाझ आएकी छिन्। कुनै समय ‘माया आरिसे’ बोलको लोकआधुनिक गीतमार्फत गायन क्षेत्रमा चर्चा बटुलेकी मेनुकाको यो तेस्रो एल्बम हो ।
यसअघि उनले ‘माया आरिसे’ र ‘१, २, ३’ नामक एल्बम ल्याएकी थिइन् । सार्वजनिक एल्बम ‘लाईफ’ मा ६ वटा लोकआधुनिक गीत छन् भने दुई गीतको म्युजिक ट्रयाक समेत समेटिएको छ । एल्बममा दुईदिने जीन्दगी, साकेला गीत, वितेका ती पलहरु, जुनीजुनीसम्म र माया आरिसे बोलका गीत समावेश छन् । ‘माया आरिसे’ मेनुकाको चर्चित गीत हो ।एल्बमका अन्य गीतमा भुपेन्द्र खड्का, पवित्रा चाम्लिङ राई र रिदम राईको शब्दरचना रहेको छ । ती गीतमा राज्य राई, पवित्रा चाम्लिङ राई र रिदम राईकै संगीत रहेको छ ।
एल्बममा समावेश गीतमध्ये ‘दुईदिने जीन्दगी’ लाई भिडियोमा ल्याइएको छ । ‘हे प्यारा प्यारा’ शीर्षक दिइएको यस भिडियोमा अकेशा विष्ट र बोनी एण्ड ग्रुपको अभिनय रहेको छ । यस भिडियोलाई पासाङ योन्जन लामाले निर्देशन गरेका हुन् । मेनुकाको ‘लाईफ’ को अडियोलाई रिभेन्स म्युजिक क्रियशनले बजारमा प्रस्तुत गरेको हो ।
नायिका हुने गुण पनि प्रशस्तै छ उनमा । प्रायजसो सबै गीतहरुमा आवाज दिनसक्ने खुबि भएकि गायिका हुन् मेनुका राइ । उनको रोजाइमा भने निकै चर्चित गीतहरुनै पर्ने गरेका छन् । गीतको भावलाई जीवन्तता दिन गायीका मेनुकाले कुनै कसर बाँकि राख्दिनन । परिणामस्वरुप उनले गाएको गीतहरु निकै नै उत्कृष्ट बन्ने गरेको छ ।
उनी खोटाङ जिल्लामा जन्मिएकी हुन । एउटा छुट्टै प्रकारको ,जोश जाँगर भएकि मेनुकाले रेडियो नेपालमा २०५६ सालमा गीत गाएर साँगेतिक यात्रा आरम्भ गरेकी हुन् । उनले सोहि समयमा मौरी घुम्छ फुलको बोटैमा गीत गाइन र त्यसैले उनलाइ चिनाउने काम गर्यो ।
