थाहा पाउनुहोस, प्यान नम्बर लिन केके कागजात चाहिन्छ ?

प्रत्येक करदाताले आफ्नो व्यवसाय कर कार्यालयमा दर्ता गरी स्थायी लेखा नम्बर लिएर कारोबार सञ्चालन गर्नुपर्दछ । व्यवसाय दर्ता गरी प्यान नम्बर लिन ढिलाई गरेमा जरिवाना समेत लाग्न सक्छ । बजारमा समयमै कर कार्यालयमा दर्ता नगरेका कारण लामो समयदेखिको जरिवाना तिर्ने करदाताहरु धेरै भेटिन्छन् । हाल कम्पनी रजिष्ट्रार कार्यालयले कम्पनी दर्तासँगै सो कम्पनीको नाउँमा स्थायी लेखा नम्बर रिजर्भ गरिदिन्छ । त्यसैले कर कार्यालयमा समयमै दर्ता गराई कर विवरण दाखिला गरेमा जरिवानाबाट बच्न सकिन्छ ।

कर कार्यालयमा कारोबार दर्ता गर्नका लागि आन्तरिक राजस्व विभागले तोकेको ढाँचामा निवेदन पेश गर्नुपर्दछ । सो निवेदन कर कार्यालयले उपलब्ध गराउँछ । त्यसबाहेक आवश्यक डकुमेन्टको सूची यहाँ उल्लेख छः

व्यक्तिगत (एकलौटी फर्म)को लागि आवश्यक कागजात

- निवेदन रु. १० को टिकटसहित

- व्यवसाय/उद्योग दर्ताको प्रमाणपत्र र सम्बन्धित कार्यालयले दिने चिठीको प्रतिलिपि

- सञ्‍चालकको नागरिकताको प्रमाणपत्रको प्रतिलिपि

- घरबहाल सम्झौताको प्रतिलिपि (आफ्नै घरमा राख्ने भए जग्गाधनी प्रमाण पूर्जाको प्रतिलिपि

- सञ्‍चालकको दुईप्रति फोटो

प्राइभेट कम्पनीको लागि आवश्यक थप कागजात

- प्रबन्ध पत्र र नियमावलीको प्रतिलिपि

- कम्पनी दर्ता प्रमाण पत्र र रजिष्ट्रार कार्यालयको चिठी

- सञ्‍चालकहरुको नागरिकता प्रमाणपत्रको प्रतिलिपि

- कर कार्यालयले दिने प्रमाण पत्रमा सहीछाप गर्ने व्यक्ति तोकेको माइन्युटको प्रतिलिपि

- कर कार्यालयलाई लेखेको पत्र