सुनको भाउ एकाएक आकासिएको छ । सुनचाँदी व्यवसायी महासंघले बिहीबार सुन प्रतितोला ६४ हजार निर्धारण गरेको छ । यो मूल्य हालसम्मकै उच्च हो ।
अन्तर्राष्ट्रिय बजारमा सुनको भाउ प्रतिऔस ३६ अमेरिकी डलरले बढेपछि त्यसको प्रभाव नेपालमा पनि देखिएको हो । नेपाल सुनचाँदी व्यवसायी महासंघका पूर्व अध्यक्ष तेजरत्न शाक्यका अनुसार यो मूल्य अहिलेसम्मकै रेकर्ड हो ।
चीन र अमेरिकाको व्यापार युद्धले प्रभावित भएको सुन बजारमा इरान र अमेरिकाबीचको पछिल्लो तनावले झन भाउ बढेको व्यवसायीहरुको भनाई छ ।
यसअघि २०७० भदौ १२ गते सुनको भाउ तोलामै ऐतिहासिक ३ हजार ४ सय रुपैयाँले बढेर मूल्य ६३ हजार ३ सय पुगेको थियो । मूल्य घटबढ हुँदै २०७५ फागुन ८ गते पुनः ६३ हजार ३ सय रुपैयाँ पुगेको थियो । अहिले भने नयाँ रेकर्ड नै कायम हुने गरि भाउ बढेको छ ।