आज बिहिबार पनि सुनको भाउले नयाँ रेकर्ड कायम गरेको छ । यसअघि मंगलबार र बुधबार नयाँ उचाईमा पुगेको सुनको भाउले आज फेरि रेकर्ड तोडेको हो ।
बुधबार ७७ हजार १ सय रुपैयाँमा कारोबार भएको छापावाला सुनको भाउ तोलामा ५ सय रुपैयाँले बढेर तोलाको ७७ हजार ६ सय रुपैयाँ पुगेको छ । आज तेजावी सुन पनि तोलामा ५ सय रुपैयाँले बढेर प्रतितोला ७७ हजार ३ सय रुपैयाँ पुगेको छ । सुनको आजको मूल्य नेपाली बजारमा हालसम्मकै बढी हो ।
आज चाँदीको भाउ पनि तोलामा १० रुपैयाँले बढेर ९१५ रुपैयाँ प्रतितोला पुगेको छ ।
नेपाल सुनचाँदी व्यवसायी महासंघले आज प्रति १० ग्राम छापावाला सुनको मूल्य ६६ हजार ५३० रुपैयाँ, प्रति १० ग्राम तेजावी सुनको मूल्य ६६ हजार २७५ रुपैयाँ र प्रति १० ग्राम चाँदीको मूल्य ७८४ रुपैयाँ ५० पैसा कायम गरेको छ ।
महासंघका अनुसार चीनबाट फैलिएको कोरोना भाइरसको कारण विश्व अर्थतन्त्रमा प्रभाव परिरहेको र त्यसको असर सुनमा पनि देखिएको हो ।