अमेरिकाका राष्ट्रपति डोनाल्ड ट्रंपकी छोरी इभान्का ट्रंपलाई भारतमा भब्य स्वागत गरिएको छ । भारत भ्रमणमा आएकी इभान्कालाई मिठा खानेकुरा र महंगा उपहार दिएर स्वागत गरिएको छ।
इन्भान्कालाई तेलंगानाका मुख्यमन्त्री के चन्द्रशेखर रावले इभान्कालाई विशेष सारी उपहार दिएका छन् । यो गोलाभामा सारीमा चाँदीको मिहिन कारीगरी छ । सारीको मूल्य ६४ लाख रुपैयाँ हो । चाँदीको मिहिन कारीगरी गरिएको सारी बनाउनका लागि १२० परिवारका कारीगरले दिनरात मेहनत गरेर दुई महिनामा सारी तयार पारेका हुन् ।
त्यस्तै उनलाई साढे दुई किलो चाँदीबाट बनेको चारमीनारको प्रतिरूप र डेढ किलो चाँदीले बनेको हाँसको एक प्रतिमा पनि उपहार दिइएको छ । भारतमा इभान्काका लागि खास डिनरको पनि आयोजन गरिएको छ।
भारतका प्रधानमन्त्री नरेन्द्र मोदीले इभान्कासँग मिलेर समिटको उद्घाटन गरे । त्यतिखेर उनले इभान्कालाई काठको बाकस पनि उपहार दिए । आफ्नो भब्य स्वागत गरिएकोमा इभान्काले खुलेर भारतको प्रशंसा गरेकी छिन। तर आलोचकहरूले चाहिँ यसरी मोदी सरकारले इभान्कालाई महंगा उपहार दिनु चाकरी हो भनेका छन् ।