रुसको शपिङ सेन्टर आगलागी, ५० भन्दा धेरैको मृत्यु

रुसको साइबेरियास्थित केमेरोभो नगरको एक शपिङ सेन्टरमा आगलागी हुँदा ५० जनाभन्दा बढीको ज्यान गएको छ । रुसी अधिकारीहरूका अनुसार साइबेरियाको केमेरोभोको शपिङ सेन्टरमा आगलागीपछि ५० जनाको ज्यान गएको छ भने १६ जना अझै हराइरहेका छ्न् । 

ठूलो बजार र धेरै किनमेल केन्द्रहरु रहेको उक्त कम्प्लेक्समा रहेको सिनेमा हलबाट आगो शुरु भएको बताईएको छ । आगलागीमा परी ज्यान गुमाउनेमा बालबालिका पनि रहेको अधिकारीहरुले बताएका छन् । भिडिओ फुटेजहरूमा आगो छिटो फैलिरहेको र कतिपय मानिसले आफ्नो ज्यान जोगाउन झ्यालबाट हामफालिरहेको देखिएको छ । आगलागीको कारण पत्ता लगाउन अधिकारीहरूले अनुसन्धान थालेका छन् ।