बंगलादेशी विमान कम्पनी युएस बांग्लाको विमान ठुलो दुर्घटनाबाट जोगिएको छ । राजधानी ढाकाबाट १७१ जना बोकेर कोक्स बजार विमानस्थलको उडेको बीएस १४१ कल साइन रहेको बोइङ ७३७ विमानले चिटागंग विमानस्थलमा आपतकालीन अवतरण गरेको हो ।
विमानले स्थानीय समय अनुसार बिहान ११:३० मा आपतकालीन अवतरण गरेको बंगलादेशी संचार माध्यमहरुले जनाएका छन् । ल्यान्डिङ गेयर फेल भएपछि पहिले चालकले आकाश मै केहि समय बिमानलाई घुमाएका थिए । पछि चिटागंग विमानस्थलले आपतकालीन अवतरणको प्रबन्ध मिलाएपछि विमानले आपतकालीन अवतरण गरेको विमानस्थलका म्यानेजर सर्वर ए जहानले बताएका छन् ।
आपतकालीन अवतरण गर्दा विमानको अगाडीको भाग रनवेमा धसिएको छ । ल्यान्डिङ गेयर फेल भई अगाडिको पांग्रा नखुल्दा जहाज धसिएको बताईएको छ । तर विमानमा सवार सबै सकुशल रहेको विमानस्थलले जनाएको छ ।
विमानमा १६४ यात्रु र चालक दलका ७ सदस्य गरी कुल १७१ जना सवार थिए ।
६ महिना अगाडी काठमाडौँ विमानस्थलमा युएस बांग्ला कै जहाज दुर्घटना हुँदा ५२ जनाको मृत्यु भएको थियो ।
हेर्नुस भिडियो ।