पाकिस्तानका पूर्व राष्ट्रपति एवम् पाकिस्तानी पिपल्स पार्टीका सह–प्रमुख असिफ अली जर्दारी पक्राउ परेका छन् । अवैध धनलाई वैध बनाएको आरोपमा उनलाई इस्लामावादबाट पक्राउ गरिएको हो ।
पाकिस्तानको उच्च न्यायालयले पूर्व राष्ट्रपति र उनकी बहिनी फरयाल तालपुरको पूर्व गिरफ्तारी जमानतलाई खारेज गरेपछि उनी पक्राउ परेका हुन् । उनीमाथि नक्कली खाताबाट वित्तीय अपचलन गरेको आरोप लागेको छ । जर्दारी र उनकी बहिनीमाथि यो मुद्दामा नक्कली खाताबाट ४.४ अर्ब रुपैयाँ देशभन्दा बाहिर पठाएको आरोप लागेको छ ।
जर्दारी यसअघि पनि भ्रष्टाचारको आरोपमा जेल गइसकेका छन् । उनी सन् २००८ देखि २०१३ सम्म राष्ट्रपति थिए । उनी आफ्नी पत्नी तथा पूर्व प्रधानमन्त्री बेनजीर भुट्टोको हत्यापछि राष्ट्रपति पदका लागि चुनिएका थिए ।