इन्डोनेसियाको पूर्वी भेगमा सोमबार ७.३ म्याग्नीच्यूडको शक्तिशाली भूकम्प गएको अमेरिकी भौगर्भिक सर्भेले जनाएको छ । निकै दुर्गम स्थानमा भूकम्प गएका कारण जनधनको क्षतिको विवरण तत्काल प्राप्त नभएको अधिकारीहरुले बताएका छन् ।
इन्डोनेसिया सरकारले सुनामीको चेतावनी भने दिएको छैन । प्रशान्त महासागरीय सुनामी चेतावनी केन्द्रले पनि जमिनमुनि निकै गहिराईमा भूकम्प गएका कारण सुनामीको चेतावनी नदिएको जनाएको छ ।
इन्डोनेसियाको आम्बोन द्वीपको दक्षिणमा केन्द्रविन्दु रहेको भुकम्पको धक्का अस्ट्रेलियासम्म महसुस गरिएको अमेरिकी भौगर्भिक सर्भेले बताएको छ ।जमिनको सतहबाट करिब २०८ किलोमिटर मुनि उक्त भूकम्पको केन्द्र रहेकाले पनि जमिनको सतहमा खासै क्षति नपुगेको सर्भेले जनाएको छ ।
