भारतको मुम्बईमा अविरल वर्षापछि एक पर्खाल भत्किँदा १८ जनाको मृत्यु भएको छ । स्थानीय समयानुसार मङ्गलबार बिहान करिब २ बजे पर्खाल भत्किएको मुम्बईको प्रकोप नियन्त्रण विभागले जनाएको छ ।
करिब दुई करोड बासिन्दा रहेको तटीय शहर मुम्बईमा भारी वर्षाका कारण दोस्रो दिन पनि जनजीवन अस्तव्यस्त बनेको भारतीय सञ्चार माध्यमले जनाएका छन् । वर्षाका कारण सरकारी विदाको घोषणा गरिएको छ । विश्वविद्यालय र विद्यालयहरु बन्द गरिएका छन् । मुम्बई विमानस्थलबाट उडान भर्ने करिब एकसय उडान रद्द गरिएको छ ।