आफ्नो अन्तिम सम्बोधनमा यसरी रोए राष्ट्रपति ओबामा (भिडियोसहित)

मोहम्मद अज्मत अलि

मोहम्मद अज्मत अलि

Jan 12, 2017 | 11:57:58 PM मा प्रकाशित

laxmi  sunrise bank

अमेरिकी राष्ट्रपति बराक ओबामाले आफूले राजनीतिक यात्रा शुरु गरेको शिकागो शहरमा आफ्ना हजारौँ समर्थकको उपस्थितिमाझ बिदाइ सम्बोधन गरेका छन्।समर्थकहरुको निरन्तरको तालीका माझ उनले आफ्नो आठ वर्षे कार्यकालमा अमेरिकालाई थप राम्रो र शक्तिशाली देश बनाएको बताए। ओबामाले आर्थिक प्रगति, इरानसँगको परमाणु सम्झौता, क्युबासँगको सम्बन्धको पुनर्स्थापना र समलिङ्गी विवाहलाई कानूनी मान्यता दिने लगायतका कामलाई आफ्ना प्रमुख उपलब्धिका रुपमा प्रस्तुत गरे। अमेरिकामा अश्वेत जातिबाट राष्ट्रपतिका रुपमा सन् २००८ मा ओबामा निर्वाचित हुँदा त्यसले आशा र परिवर्तनको सन्देश बोकेको थियो।

उनले आफूले कार्यकाल शुरु गरेको समयभन्दा अहिलेको अमेरिका राम्रो र शक्तिशाली भएको बताए। तर त्यसबेला आफूले गरेको रंगभेदविनाको अमेरिकाको परिकल्पना यथार्थवादी नरहेको बताए। अहिले पनि जातिवाद अमेरिकाका लागि प्रमुख विभाजनकारी विषय रहेको ओबामाको निचोड थियो।

ओबामाको उत्तराधिकारीका रुपमा आगामी जनवरी २० मा शपथग्रहण गर्न लागेका राष्ट्रपति-निर्वाचित डोनल्ड ट्रम्पले उनका कतिपय नीतिहरु उल्ट्याउने चेतावनी दिएका छन्। आफ्नो सम्बोधनमा आशावादी देखिएका ओबामाले राष्ट्रपतिहरुबीच शान्तिपूर्ण रुपमा हुने शक्ति हस्तान्तरण अमेरिकी प्रजातन्त्रको, उनकै शब्दमा, आधारशिला भएको बताए। 

उनले भने, "आठ वर्षअघि भन्दा अहिले अमेरिका हरहिसाबले राम्रो भएको छ, तर लोकतन्त्रलाई हामीले यस्तै त हो भनेर लिन थाल्यौं भने त्यो जोखिममा पर्छ।"आर्थिक असमानता, जातीय विभाजन र तथ्यका आधारमा अवधारणा नबनाइ फोका जसरी टिप्पणी गरिने समाजका विभिन्न तहहरु अमेरिकाको लोकतन्त्रका तीन जोखिम भएको ओबामाको भनाइ थियो। उनले अलकायदा नेता ओसामा बिन लादेनसहित दशौँ हजार आतंकवादीलाई समाप्त पारेको भन्दै सुरक्षा निकायहरुलाई धन्यवाद पनि दिएका थिए।सन् २००८ मा ओबामाले आफ्नो विजयी भाषण पनि शिकागो शहरमा नै गरेका थिए। 

ह्वाइट हाउसबाट सम्बोधन गर्नुभन्दा आफूले राजनीति शुरु गरेकै स्थानमा फर्किएर बोल्न चाहेको उनले बताए। अधिकारीहरुले ट्रम्पका समर्थकसहित सबै अमेरिकी नागरिकलाई सम्बोधन गर्ने गरी ओबामाको सम्बोधन लेखिएको जनाएका छन्। प्रथम महिला मिशेल ओबामा, उपराष्ट्रपति जो बाइडेन तथा उनकी श्रीमती जिल लगायत उक्त बिदाइ मन्तव्य-समारोहमा उपस्थित थिए। राष्ट्रपतिले बिदाइ सम्बोधन गर्ने परम्परा अमेरिकी राजनीतिमा लामो समयदेखि रहँदै आएको छ।

सम्बोधनमा उनी भावुक बनेका थिए । सम्बोधन कै क्रममा उनले रुमाल झिकेर आँसु पुछेका थिए । 

हेर्नुस भिडियो ।

Share Your Thoughts

Recent News

Main News

TRENDING

Close in 7


Bizpati.com © 2020. All Rights Reserved