मध्य भोटेकोशी जलविद्युत कम्पनीले निष्काशन गरेको सिमित आईपिओमा हालसम्म एक अर्ब बढीको आवेदन परेको छ । कम्पनीले कात्तिक २८ देखि मंसिर १४ गतेसम्मको लागि १ अर्ब १७ करोड बराबरको १ करोड १७ लाख कित्ता शेयर निष्काशन गरेको हो । बिक्रि प्रबन्धक ग्लोबल आईएमई क्यापिटलले दिएको जानकारी अनुसार आज शुक्रबार दिउँसो १ बजेसम्ममा ३४ हजार ३ सय ९४ आवेदकले १ करोड १ लाख ८१ हजार ४ सय कित्ताको लागि आवेदन गरेका हुन्।
यो आईपिओमा कर्मचारी सञ्चय कोषका सञ्चयकर्ताले मात्र दिन सक्ने छन् । संचयकर्ताहरु ६ लाखको संख्यामा भए पनि हालसम्म ३४ हजार ३ सय ९४ जनाले मात्र आवेदन दिएका छन् । यस हिसाबमा हेर्दा एकदमै न्यून संचयकर्ताले मात्र आवेदन दिएका छन् । यद्यपि ८७ प्रतिशत शेयर भने बिक्रि भएको छ । मंसिर १४ गतेसम्म आवेदन दिन पाइने भएकोले अझै धेरै संचयकर्ताले आवेदन दिने अनुमान बिक्रि प्रबन्धकको छ ।
कम्पनीले मंसिर १९ गतेदेखि २६ गतेसम्म दोस्रो चरणको शेयर निष्काशन गर्ने छ । यस चरणमा संस्थापक सेयरधनी संस्थाका कर्मचारी र ऋणदाता संस्था (कर्मचारी सञ्चय कोष) का कर्मचारीले मात्र आवेदन दिन पाउने छन् । संस्थापक शेयरधनी संस्थामा (चिलिमे जलविद्युत कम्पनी लि., नेपाल विद्युत प्राधिकरण, सिन्धुपाल्चोक हाइड्रोपावर कम्पनी लि., सिन्धु इन्भेष्टमेन्ट कम्पनी प्रा.लि., नेपाल अरनिको हाइड्रोपावर कम्पनी प्रा.लि. तथा सिन्धु भोटेकोशी हाइड्रोपावर लि.)का कर्मचारीहरु पर्ने छन् । संस्थापक सेयरधनी संस्थाका कर्मचारीहरुको लागि २१ लाख कित्ता शेयर र (कर्मचारी सञ्चय कोष) का कर्मचारीहरुका लागि ६ लाख कित्ता शेयर छुट्याइएको छ । यसरी २ चरणमा गरेर कम्पनीले १ करोड ४४ लाख कित्ता शेयर निष्काशन गर्ने भएको हो ।
कर्मचारी सञ्चय कोषका बचतकर्ता र संस्थापक संगठित संस्थाका कर्मचारीले कम्तीमा ५० कित्तादेखि ५ सय कित्तासम्मका लागि आवेदन गर्न पाउनेछन् । त्यसै गरी ऋणदाता कर्मचारी सञ्चयकोषका कर्मचारीले कम्तीमा ५० कित्तादेखि १२ सय कित्तासम्मका लागि शेयर आवेदन गर्न सक्ने छन् ।
