शिवम सिमेन्ट लिमिटेडले निष्काशन गरेको आईपिओमा आवेदन दिने आज फागुन १४ गते अन्तिम दिन रहेको छ । कम्पनीको आईपिओमा सोमबार साँझसम्ममा सर्वसाधारणतर्फ ४६ हजार ४६ जना आवेदकबाट ४६ लाख ८८ हजार १२० कित्ताका लागि आवेदन परेको छ । त्यस्तै स्थानीय तर्फ ७ सय ८५ जनाले ३ लाख ६८ हजार ५८० कित्ताका लागि आवेदन दिएको बिक्रि प्रबन्धक सिद्धार्थ क्यापिटलले जनाएको छ ।
कम्पनीले स्थानीय र सर्बसाधारणलाई आईपिओ निष्काशन बिक्रि खुला गरेको हो । जस अनुसार सर्वसाधारणलाई ४४ लाख कित्ता आईपिओ निष्काशन गरिएको छ । कुल ४४ लाख कित्ता मध्ये कम्पनीले कर्मचारी र सामुहिक लगानी कोषलाई समान २ लाख २० हजार कित्ता छुट्याएको छ । बाँकि रहेको ४१ लाख २० हजार कित्ताको लागि सर्वसाधारणले आवेदन गर्न सक्ने छन्। यस अनुसार सर्वसाधारणतर्फ पुरै शेयरको लागि माग आएको छ । स्थानीय तर्फको शेयरको लागि पुरै माग आई नसकेकोले ति शेयर पनि सर्वसाधारणलाई बिक्रि गरिने क्यापिटलले जनाएको छ ।
सर्वसाधारणले न्युनतम ५० कित्ता र अधिकतम ४४ लाख कित्ताको लागि आवेदन गर्न सक्ने छन् । कम्पनीले सर्वसाधारणलाई १ सय रुपियाँ अंकित मूल्यमा २०० प्रिमियम थप गरी प्रति कित्ता ३ सय रुपियाँमा शेयर निष्काशन गरेको हो । कम्पनीले यस अघि सर्वसाधारणलाई ४ सय र स्थानीयलाई ३ सयमा शेयर जारी गर्नको लागि नेपाल धितोबोर्डबाट स्वीकृति लिएको थियो ।
कम्पनीले स्थानीयहरुलाई यस अघि नै प्रति कित्ता ३०० सयमा शेयर निष्काशन गरी बाँडफांड समेत गरिसकेको छ । यस अघि शेयर भरेका स्थानीयलाई निशुल्क थप शेयर उपलब्ध गराईने कम्पनीले जनाएको छ । स्थानीयलाई ८ लाख ८० हजार कित्ता शेयर निष्काशन गरिएकोमा २ लाख २ सय ४० कित्ताको लागि मात्र आवेदन परेको थियो । यस अघि शेयर खरिद गरेका स्थानीयलाई कुल १ लाख १ सय २० कित्ता थप शेयर निशुल्क उपलब्ध गराईने कम्पनीले जनाएको छ ।
स्थानीयको लागि छुट्याइएको शेयर मध्ये बाँकि रहेको ५ लाख ७९ हजार ६ सय ४० कित्ताको लागि स्थानीयले पुन आवेदन दिन सक्ने भएका छन् । यस पटक उनीहरुले प्रति कित्ता २ सय मै आवेदन दिन सक्ने छन् । यस अघि स्थानीयको रुपमा आवेदन दिएका र नदिएकाले पनि आवेदन दिन सक्ने कम्पनीले जनाएको छ । स्थानीयले न्युनतम ५० कित्ता र अधिकतम ५ लाख ७९ हजार ६ सय ४० कित्ताको लागि आवेदन दिन सक्ने छन्।
