माउन्टेन हाइड्रो नेपाल लिमिटेडले सर्वसाधारणको लागि निष्काशन गरेको आईपिओमा तेस्रो दिनसम्म २४ करोड १८ लाख रुपैयाँको आवेदन परेको छ । बिक्रि प्रबन्धक सिद्धार्थ क्यापिटलका अनुसार आइतबार बेलुका ५ बजेसम्ममा ३५ हजार ३५ आवेदक बाट २४ लाख १८ हजार ७ सय ९० कित्ताको लागि आवेदन परेको छ ।
कम्पनीले बिहिबारदेखि शेयर बिक्रि खुला गरेको हो । कम्पनीले यस अघि स्थानीयलाई शेयर निष्काशन गर्दा बिक्रि नभएको ५ लाख ६६ हजार १ सय १० कित्ता समेत जोडेर सर्वसाधारणलाई १८ लाख १६ हजार १ सय १० कित्ता शेयर निष्काशन गरेको हो । कुल १८ लाख १६ हजार १ सय १० कित्ता शेयर मध्ये ३६ हजार ३ सय २२ कित्ता कर्मचारीलाई र ४० हजार कित्ता सामुहिक लगानी कोषको लागि निष्काशन गरि बाँडफांड गरीएको कम्पनीले जनाएको छ । बाँकि रहेको १७ लाख ३९ हजार ७ सय ८८ कित्ताको लागि सर्वसाधारणको लागि निष्काशन गरिएको हो । यस हिसाबमा तेस्रो दिनसम्म १.३ गुणा बढी आवेदन परेको हो ।
लगानीकर्ताले न्युनतम ५० कित्ता र अधिकतम ८० हजार कित्तासम्मको लागि आवेदन दिन सक्ने छन् । कम्पनीको आईपिओमा छिटोमा फागुन २८ सम्म आवेदन दिन सकिने बिक्रि प्रबन्धक सिद्धार्थ क्यापिटलले जनाएको छ । नेपाल धितोपत्र बोर्डले फागुन १ गते कम्पनीलाई शेयर निष्काशनको अनुमति दिएको हो । कम्पनीले यस अघि पहिलो चरणमा असार २२ देखि आयोजना प्रभावीत स्थानीयबासीका लागि १२ करोड ५० लाख रुपैयाँ बराबरको १२ लाख ५० हजार कित्ता आईपिओ निष्कासन गरेको थियो ।
कम्पनीको आईपिओले ग्रेड ४ को आईपिओ रेटिंग पाएको छ । यसले कम्पनीको आधारभूत पक्ष औसत भन्दा कमजोर रहेको जनाउछ । कम्पनीले पाँचथरको फिदिम गाविसमा २१.६ मेगावाटको तल्लो हेवाखोला जलविद्युत आयोजना निर्माण गरिरहेको छ ।
यो पनि :