युनियन हाइड्रोपावर कम्पनी लिमिटेडलाई आईपिओ बिक्रि गर्न हम्मेहम्मे परेको छ । कम्पनीले चैत्र १३ गतेदेखि निष्काशन गरेको आईपिओमा हालसम्म ३४ करोड ८६ लाख बढीको आवेदन परेको छ । बिक्रि प्रबन्धक लक्ष्मी क्यापिटलका अनुसार आज मंगलबार बेलुका ५ बजेसम्म कम्पनीको आईपिओमा ४४ हजार ३ सय ३६ आवेदकबाट ३४ लाख ८६ हजार ३ सय ३० कित्ताको लागि आवेदन परेको छ । कम्पनीले सर्वसाधारणको लागि ३५ लाख ३४ हजार ३ सय ४० कित्ता निष्काशन गरेको थियो।
युनियन हाइड्रोको आइपीओमा अब ढिलोमा अगामी बैशाख १२ गतेसम्म आबेदन दिन सक्नेछन। कम्पनीको अझै पनि ४८ हजार १० कित्ता बिक्रि हुन् बाँकि छ । १२ गतेसम्म पनि शेयर बिक्रि नभएमा बिक्रि नभएको शेयरमा प्रत्याभूतकर्ताहरुले सकार्नु पर्ने छ ।
यो पनि: युनियन हाइड्रोको आइपीओ: यस्तो छ कम्पनीको दाबी र वास्तविकता (विश्लेषण) |
कम्पनीले आयोजना प्रभावित स्थानीयको लागि साउन १४ गतेदेखि ७ करोड ५० लाख रुपैयाँ बराबरको ७ लाख ५० हजार कित्ता आइपीओ निष्काशन गरेको थियो । जस मध्ये १ लाख २८ हजार २ सय १० कित्ताको लागि मात्र आवेदन परेको थियो । त्यस समयमा बिक्रि नभएको ६ लाख २१ हजार ७ सय ९० कित्ता समेत थपेर कम्पनीले सर्वसाधारणलाई ३५ लाख ३४ हजार ३ सय ४० कित्ता शेयर निष्काशन गरेको हो।
युनियन हाइड्रोको आइपीओमा आबेदन दिन इच्छुक लगानीकर्ताले नेपाल धितोपत्र बोर्डबाट आश्वा अनुमति पाएका सम्पूर्ण बैंक तथा वित्तीय संस्थाका ७७ जिल्लाबाटै र मेरो सेयर मार्फत आवेदन गर्न सक्नेछन।
आईपिओमा न्यूनतम ५० कित्ता र अधिकतम ३५ हजार कित्तासम्म आवेदन दिन सकिने छ। कम्पनीको आईपिओले ५ ग्रेड पाएको छ जुन सबै भन्दा कमजोर हो। नेपाल धितोपत्र बोर्डले कम्पनीलाई माघ २८ गते सोमबार शेयर निष्काशनको अनुमति दिएको हो। शेयर निष्काशनको लागि लक्ष्मी क्यापिटललाई बिक्रि प्रबन्धक रहेको छ । कम्पनीले लमजुङको मिदिम खोलामा ३ मेगावाटको आयोजना निर्माण सम्पन्न गरी १ बर्ष देखि ब्यापारिक उत्पादन गरिरहेको छ।
