त्रिभुवन अन्तर्राष्ट्रिय विमानस्थलमा मंगलबार दिउँसो उडान अवतरण प्रभावित भएको छ । एयर ट्राफिक बढ्दा झन्डै एक दर्जन जहाज आकाशमा नै घुमिरहेका छन् ।
सेना दिवस एवम् महाशिवरात्रीको तयारीको लागि नेपाली सेनाले हेलिकप्टर उडाएर आकाशमा रिहर्सल गरेका कारण उडान अवतरण प्रभावित भएको हो । यो समाचार तयार पार्दासम्म दिल्लीबाट काठमाडौँ आएका भिस्तारा एयर, नेपाल एयरलायन्स, एयर इन्डिया र अन्य स्थानबाट आएका आन्तरिक र अन्तर्राष्ट्रिय गरी १२ जहाज ल्याण्ड गर्ने पर्खाइमा छन् ।
विमानस्थलका महाप्रबन्धक देवेन्द्र केसीका अनुसार बिहान मौसम खराब भएर धेरै उडान हुन नसकेको र दिउँसो सेनाले अभ्यास गरेको कारणले पनि ट्राफिक समस्या देखिएको हो । उनले सेनालाई अभ्यास छोट्याउन आग्रह गरिसकेको र केहि समय मै समस्या हल हुने बताए ।