लकडाउन खुकुलो भएसंगै आम लगानीकर्तामा शेयर बजार खुल्छ कि खुल्दैन भन्ने चासो बढेको छ । सरकार बैंक, बीमा सहितका विभिन्न आर्थिक क्रियाकलाप सुचारु गर्ने निर्णय गरेसंगै बजारबारे आम लगानीकर्ता र सरोकारवालाको चासो बढेको हो ।
नेपाल धितोपत्र बोर्डले शेयर बजार संचालनको लागि आवश्यक तयारी गरिरहेको जनाएको छ । वोर्डको वार्षिकोत्सवको अवसरमा अर्थमन्त्रीले समेत आवश्यक तयारी गर्न निर्देशन पनि दिएको र लकडाउन पनि खुकुलो भएकोले बजार संचालनबारे तयारी गरिरहेका जनाएको हो ।
बोर्डका प्रबक्ता निरज गिरीले सरकारले बोर्डलाई नै बजार संचालन गर्ने जिम्मेवारी दिएकोले निर्देशन अनुसार अगाडी बढ्ने बताए । लकडाउन खुकुलो बनाउने जानकारी आएको भएपनि सरकारको औपचारिक निर्णय आईनकेकोले निर्णय आएपछि सोहि अनुसार अगाडी बढ्ने प्रबक्ता गिरीले बताए ।
उनले सरकारको औपचारिक निर्णय आएपछि नेप्से, मन्त्रालयका साथै सम्बद्ध सबै पक्षसँग छलफल गरि बजार संचालनबारे निर्णय लिईने बताए । त्यस्तै छलफलपछि नै कुन मोडालिटीमा बजार खोल्ने, के के अतिरिक्त ब्यबस्था गर्ने, कति समय खुल्ने लगायतको विषय टुंगो लाग्ने उनले बताए । सरकारको औपचारिक निर्णयमा शेयर बजारबारे केहि आएमा सोहि अनुसार अगाडी बढ्ने र केहि नआएको खण्डमा बोर्डले छलफल गरेर अगाडी बढ्ने उनले बताए ।
नेपाल स्टक एक्सचेन्ज नेप्सेले लकडाउन अवधि कायम नै रहेकोले जेठ ३२ गते सम्म बजार बन्द गर्ने निर्णय गरेको थियो । तर अब लकडाउन खुकोलो भएकोले बजार खुल्ने सम्भावना छ । अर्थमन्त्री पनि शेयर बजार खुलाउनु पर्ने पक्षमा रहेको र नेप्से, ब्रोकर, लगानीकर्ताहरुले पनि बजार खुल्नु पर्ने बताएकोले बजार खुल्ने सम्भावना बढेको हो । यस अघि लकडाउन कै बीचमा पनि २ दिन शेयरबजार संचालन भएको थियो ।