नबिल बैंक र सिटिजन्स बैंकले साधारण सभा आह्वान गरेका छन् । नबिल बैंकले असोज १० गते र सिटिजन्सले असोज ९ गते साधारणसभा आह्वान गरेका हुन् ।
साधारणसभामा नबिल बैंकले लाभांश प्रस्ताव लैजाने छ । नबिल बैंकले ३० प्रतिशत बोनस र १८ प्रतिशत नगद गरि ४८ प्रतिशत लाभांश दिने निर्णय गरेको छ । साधरणसभा र लाभांश प्रयोजनको लागि बैंकले भदौ २७ गते सेयरधनी दर्ता किताब बन्द गर्ने भएको छ । भदौ २६ गतेसम्म कायम बैंकका सेयरधनीले मात्र लाभांश पाउने र साधारणसभामा भाग लिन पाउने छन् ।
३० प्रतिशत बोनस सेयर वितरण पश्चात बैंकको चुक्ता पुंजी ८ अर्ब ३ करोड पुग्नेछ। हाल बैंकको चुक्ता पुंजी ६ अर्ब १८ करोड रहेको छ। बैंकले गत आर्थिक बर्ष ३ अर्ब ६२ करोड खुद मुनाफा गरेको थियो।
त्यस्तै सिटिजन्स बैंकले असोज ९ गते साधारणसभा डाकेको छ । साधारणसभामा बैंकले लाभांश प्रस्ताव लैजाने छ । गत आर्थिक बर्षको कमाईबाट सिटिजन बैंकले १६ प्रतिशत बोनस सेयर र कर प्रयोजनको लागि १ प्रतिशत नगद लाभांश वितरण गर्ने निर्णय गरेको छ।
बैंकले साधारणसभा प्रयोजनका लागि भदौ १२ देखि १६ गतेसम्म सेयरधनी किताब बन्द गरेको थियो । भदौ ११ गतेसम्म कायम रहेका बैंकका सेयरधनीले मात्र साधारणसभामा भाग लिन र बोनस पाउने छन् ।
बोनस सेयर बितरण पश्चात बैंकको चुक्ता पुंजी ८ अर्ब नाघ्नेछ। हाल बैंकको चुक्ता पुंजी ६ अर्ब ९२ करोड रुपैयाँ रहेको छ।
