सेन्चुरी कमर्शियल बैंकको बिशेष साधारणसभाबाट अल्पाइन डेभलपमेन्ट बैंक र सेती फाइनान्सलाई प्राप्ती गर्ने प्रस्ताव पारित भएको छ। भदौ २३ गते शुक्रबार बसेको बिशेष साधारणसभाले अल्पाइनलाई ९३ र सेती फाइनान्सलाई ७० प्रतिशतको स्वाप अनुपातमा प्राप्ति गर्ने प्रस्ताब स्वीकृत गरेको हो।
नेपाल राष्ट्र बैंकले तोकेको चुक्ता पुंजी ८ अर्ब पुर्याउन ससाना वित्तीय संस्था प्राप्ती गरेको सेन्चुरीले हाल ४० प्रतिशत हकप्रद बिक्री गरिरहेको छ। अल्पाइन डेभलपमेन्ट तथा सेती फाइनान्सलाई समेत पुंजीकृत गर्दा बैंकको चुक्ता पुंजी ७ अर्ब ८६ करोड हुन आउँछ। ३ प्रतिशत बोनस सेयर बितरण गर्दा पनि बैंकको चुक्ता पुंजी ८ अर्ब १० करोड पुग्नेछ। त्यस्तै बैंकको शाखा संख्या ९० पुगेको छ।
तीन संस्था प्राप्ती अघि सेन्चुरीको कमाई ६१ करोड,रिजर्भमा १ अर्ब बढी हुँदा लाभांश क्षमता कति ?
बैंकको वित्तीय अवस्था र लाभांश क्षमता
बाणिज्य बैंक मध्ये सबै भन्दा ढिलो आफ्नो वित्तीय विवरण सार्वजनिक गरेको सेन्चुरी बैंकले गत आर्थिक बर्ष ४४ करोड ७४ लाख ९९ हजार रुपैंया खुद नाफा कमाएको छ । बैंकले तीन वटा वित्तीय संस्था (अरनिको, इन्नोभेटिब डेभलपमेन्ट बैंक र सगरमाथा फाइनान्स) बाट गत आर्थिक बर्षको असार मसान्तसम्मको खुद मुनाफा १६ करोड ७८ लाख जगेडा कोषमा राखेको छ। यस आधारमा प्राप्ती अघि बैंकको खुद मुनाफा ६१ करोड ५३ लाख हुन आउँछ।
सेन्चुरी बैंकसंग अघिल्लो आर्थिक बर्षको रिटेन अरनिङ ७ लाह ७५ हजार रहेको छ भने विभिन्न संस्थाहरु प्राप्ती गर्दा स्वापबाट १५ करोड ५५ लाख आम्दानी गरेको छ। त्यस्तै अवितरित हकप्रद लिलामी मार्फत बिक्री गर्दा करिब ५ करोड ७२ लाख प्रिमियम संकलन भएको छ। यस अवधिमा बैंकको जगेडा कोषमा १ अर्ब १८ करोड छ।
गत आर्थिक बर्षको कमाई, जगेडा कोष रकम, अघिल्लो आर्थिक बर्षको रिटेन अर्निङ, प्रिमियम संकलनको रकमको आधारमा सेन्चुरी बैंकले ३ प्रतिशत बोनस सेयर र ५ प्रतिशत नगद लाभांश दिने प्रक्षेपण गरिएको छ। बैंकसंग ९ प्रतिशत बोनस सेयर दिने क्षमता रहेको छ।
