रिलायन्स फाइनान्स लिमिटेडले मङ्सिर २२ गतेदेखि हकप्रद निष्काशन गर्ने भएको छ । नेपाल धितोपत्र बोर्डले फाइनान्सलाई ४५ प्रतिशत हकप्रद निष्काशनको अनुमति दिएको थियो ।
अब फाइनान्सले २३ करोड ६ लाख बराबरको सय रुपियाँ अंकित २३ लाख ६ हजार ५ सय ७१ दशमलव ६० कित्ता हकप्रद निष्काशन गर्ने छ । हकप्रद निष्काशनको लागि सनराइज क्यापिटल लिमिटेड बिक्रि प्रबन्धक रहेको छ ।
लगानीकर्ताले पुस २७ गतेसम्म हकप्रद भर्न सक्ने छन् । हकप्रद प्रयोजनको लागि कम्पनीले मङ्सिर ८ गते बुक क्लोज तय गरेकाले मङ्सिर ७ गतेसम्म कायम शेयरधनीले मात्र हकप्रद भर्न सक्ने छन् ।
लगानीकर्ताले उपत्यका भित्र सनराइज क्यापिटल लिमिटेडको कार्यालय कमलपोखरी र रिलायन्स फाइनान्सको शाखा कार्यालयहरु बाट आवेदन दिन सक्ने छन् । उपत्यका बाहिर भने रिलायन्स फाइनान्सका शाखाहरु महेन्द्र पुल पोखरा, नारायणगढ चितवन, बेशीशहर लमजुंग, जनागाल बनेपा काभ्रे, आरुघाट पोखरा र चारआली झापाबाट आवेदन दिन सकने छन् । त्यस्तै सनराइज बैंकका शाखाहरु विराटनगर, बिरगंज, बुटवल, धरान , नेपालगन्ज, लहान, दमक र राजविराजबाट पनि आवेदन दिन सक्ने छन् ।
हाल कम्पनीको चुक्ता पुंजी ५१ करोड २५ लाख रहेकोमा ४५ प्रतिशत हकप्रद निष्काशनपछि चुक्ता पुंजी ७४ करोड ३२ लाख पुग्ने छ । कम्पनीले गत आर्थिक बर्ष २ करोड ५० लाख खुद नाफा कमाएको थियो ।
