मेगा बैंकले बिशेष साधारणसभा स्थगीत भएको बिषयमा आफ्नो आधिकारिक धारणा सार्वजनिक गरेको छ। गणपुरक संख्या नपुगेर साधारणसभा स्थगित भएको जनाइएको छ।
संचालक समितिका अध्यक्ष भोजबहादुर शाहले सोमबार बोलाइएको विशेष साधारण सभामा आवश्यक कोरम नपुगेकाले मर्जरजस्तो महत्वपूर्ण निर्णय लिनका लागि अर्को साधारणसभा आह्वान गर्न लागिएको बताएका छन।
अर्को साधारणसभा आब्हान गरि टुरिजम बिकास बैंकसंगको मर्जर प्रक्रिया तत्काल टुंगोमा पुर्याउन शेयरधनीले संचालक समितिलाई अनुमति दिएको बैंकद्वारा जारि बिज्ञप्तीमा उल्लेख छ। अर्को बिशेष साधारणसभा छिट्टै बोलाइने बैंकले जनाएको छ।
तर सोमबार आर्मी अफिसर्स क्लबमा बसेको बिशेष साधारणसभाको दृश्य भने बैंकले जारि गरेको बिज्ञप्तीमा उल्लेख तर्क भन्दा फरक देखिएको थियो। मेगा बैंकका शेयरधनीहरुले टुरिजमसंगको स्वाप अनुपातमा असन्तुष्टि जनाउदै बिबाद झिकेपछि साधारणसभा स्थगित भएको थियो।
मर्जरमा जाने र नजाने पक्षबीच आ-आफ्नो पक्षमा प्रोक्सी जुटाउने प्रतिस्पर्धा चलिरहँदा बैंकको साधारणसभा ४ बजेसम्म पनि निर्णय बिहिन अवस्थामा थियो। संचालक समितिले पुर्व सम्झौता अनुसार टुरिजमलाई ९५ प्रतिशत स्वाप दिनुपर्ने बताईरहंदा बैंकका शेयरधनीहरुले भने दुबै बैंकको चलअचल सम्पत्ति दायित्व तथा कारोबार मूल्याँकन प्रतिवेदन (डीडीए) बाट आएको स्वाप रेशियो ९१.९७ प्रतिशतमा नै टुरिजमसंग मर्जरमा जानु पर्ने अडान राखेका थिए।
बैंकका शेयरधनीहरुको असन्तुष्टि स्वापमा मात्र सिमित थिएन। उनीहरुले मेगाको ६५ प्रतिशत हकप्रदलाई समायोजन गरिएपनि टुरिजमले निष्कासन गरेको हकप्रद समायोजन नगरिएकोमा आपत्ति जनाएका थिए। टुरिजमले निष्काशन गरेको शतप्रतिशत हकप्रदलाई समायोजन नगरी डिडिए गणना भएकाले यी दुवै बैंकबीच मर्जर हुन नसक्ने भन्दै अधिकांश शेयरधनीहरुले साधारणसभा छाडेर हिंडेपछी कोरम पुगेको थिएन। यद्दपी मर्जरका कारण उत्पन्न बिबादले गर्दा साधारणसभा स्थगित भएको भन्ने कुरा बैंकद्वारा जारि बिज्ञप्तीमा कहीं कतै उल्लेख छैन।
यसैबीच, दुई जना शेयरधनीले साधारण सभा रोक्नका लागि पाटन उच्च अदालतमा अन्तरिम आदेश माग गरी दिएको निवेदनमा अदालतले साधारण सभा रोक्न नपर्ने गरी सोमबारै आदेश जारी गरेको छ। साधारणसभा अघि बढाउन अब मेगा बैंकलाई कानुनी रुपमा कुनै बाधा अड्चन नभएको बैंकले जनाएको छ।
टुरिजम डेभलपमेन्ट बैंकसँगको मर्जरपछि मेगा बैंक चुक्ता पुँजीका आधारमा नेपालका बाणिज्य बैंकहरुमध्येकै एउटा ठूलो बैंक हुने बैंकको दाबि छ।
अब के होला ?
मर्जरमा जाने प्रस्ताब राखेर दुबै बैंकले एकै दिन साधारणसभा सभा डाकेपनि टुरिजमबाट मात्र मर्जर प्रस्ताब पारित भएकाले मर्जर प्रक्रिया नै अन्यौलता देखिएको छ।
यद्दपी बैंकका प्रमुख कार्यकारी अधिकृत अनिल शाहले गणपुरक संख्या नपुगेकाले साधारणसभा स्थगित भएको जानकारी दिंदै अब हुने साधारणसभाले मर्जर प्रस्ताब पारित गर्ने बताएका छन।
'गणपुरक संख्या नपुगेकाले साधारणसभा रोकिएको हो, अर्को पटक २५ प्रतिशत गणपुरक संख्या भएपनि साधारणसभा हुन्छ' शाहले भने, 'अर्को बिशेष साधारणसभा छिट्टै हुन्छ।'
टुरिजमले मेगासंग ९५ प्रतिशतको स्वाप अनुपातमा मर्ज हुनेगरि प्रस्ताब पारित गरिसकेको छ। यथास्तिथिमा टुरिजम् र मेगा बैंक गाभिएपछी बन्ने मेगा बैंकको चुक्तापूँजी झण्डै साँढे दश अर्ब पुग्नेछ।
