देब बिकास बैंकले हकप्रद प्रयोजनका लागि शेयरधनी दर्ता पुस्तिका बन्द गर्ने निर्णय गरेको छ। ४० प्रतिशत हकप्रद बिक्रि प्रयोजनार्थ फागुन १७ गते बुक क्लोज गर्ने निर्णय गरेको नेप्से मार्फत बैंकले जनाएको छ।
हकप्रदका लागि फागुन १७ गते बुक क्लोज गर्ने निर्णय भएकाले फागुन १६ सम्म कायम शेयरधनीहरुले मात्र देब विकास बैंकको ४० प्रतिशत हकप्रद भर्न पाउनेछन।
देबले नेपाल धितोपत्र बोर्डबाट माघ २६ गते मात्र हकप्रद बिक्रि गर्ने स्वीकृती प्राप्त गरेको हो। बैंकले ६५ करोड ३३ लाख रुपैयाँ बराबरको ६५ लाख ३३ हजार १०८.५९ कित्ता हकप्रद बिक्रि गर्न लागेको हो। हकप्रद बिक्रिका लागि बैंकको शेयर निष्काशन तथा बिक्रि प्रबन्धकमा एनआइबिएल क्यापिटल रहेको छ।
४० प्रतिशत हकप्रद बिक्रि पश्चात बैंकको चुक्ता पुंजी १ अर्ब ६३ करोडबाट २ अर्ब २८ करोड पुग्नेछ। बैंकले २ अर्ब ५० करोड चुक्ता पुंजी पुर्याउनुपर्नेछ। बैंकले चालु आर्थिक बर्षको दोस्रो त्रैमासमा १४ करोड ६ लाख खुद मुनाफा आर्जन गरेको छ।
