शेयर बजारमा निरन्तर ओरालो लागेको बिषय संसदमा पनि उठेको छ । मंगलबार बसेको राष्ट्रिय सभाको बैठकमा नेपाली कांग्रेसका सांसद राधेश्याम अधिकारीले शेयर बजारमा भइरहेको गिरावटबारे सरकारको ध्यानाकर्षण गराएका हुन् ।
बैठकलाई सम्बोधन गर्दै उनले शेयरबजारमा धनीले मात्र नभई साना साना लगानीकर्ताले पनि थोरै थोरै रकम लगानी गरेको स्मरण गराए । उनले भने 'अर्थमन्त्रीज्युको भाषणले बजार घटेको भन्ने आईरहेको छ, शेयर बजार अनुत्पादक हो कि होइन भन्नेबारे सरकारको दृष्टिकोण के हो , स्पस्ट पार्नु पर्यो' ।
उनले थपे 'शेयर बजार नचाहिने हो भने सरकारले भनोस् । तर चाहिन्छ भने यसरी बजार घट्दा सरकारले ध्यान दिनु पर्छ कि पर्दैन? ’ उनले यस बिषयमा यथाशिघ्र स्पष्ट पार्न पनि अर्थमन्त्री युवराज खतिवडा आग्रह गरे । अर्थमन्त्री खतिवडा राष्ट्रिय सभाका सदस्य हुन् ।
