रैराङ हाइड्रोपावर डेभलपमेन्ट कम्पनीले सर्बसाधारणको लागि निष्काशन गरेको आईपिओमा १६ गुणा बढी आवेदन परेको छ । कम्पनीले बैशाख ३१ गतेदेखि आईपिओ बिक्रि खुला गरेको हो । कम्पनी ८ करोड ४० लाख रुपैयाँ बराबरको ८ लाख ४० हजार कित्ता आइपिओ निष्काशन गरेको हो ।
आईपिओमा १ लाख ७५ हजार २ सय ९२ जना आवेदकले १ करोड ३५ लाख ७६ हजार ३ सय ९० कित्ताको लागि आवेदन दिएका छन् । यो कित्ता कुल निष्काशनको १६ गुणा भन्दा धेरै हो । अझै कारोब ८ सय आवेदन भेरिफाई हुने चरणमा रहेकोले यो संख्या अझै बढ्न सक्ने बिक्रि प्रबन्धक एनआईबिएल एस क्यापिटल लिमिटेडले जनाएको छ । क्यापिटलका अनुसार हालसम्म १ अर्ब ३५ करोड ५७ लाख रुपैयाँको आवेदन भेरिफाई भएको छ । आवेदन भेरिफाई हुने क्रममै रहेकोले बाँडफांडको मिति अहिले नै तोक्न नसकिने क्यापिटलले जानकारी दिएको छ । आईपिओमा ९१ हजारभन्दा धेरैले शेयर नपाउने पक्का छ ।
निष्काशन गरिएको ८ लाख ४० हजार कित्ता मध्ये ३३ हजार ६ सय कित्ता कर्मचारीको लागि सुरक्षित गरिएको छ भने ४२ हजार कित्ता सामुहिक लगानी कोषहरुमा बाँडफांड गरिएको छ ।
कम्पनीले यस अघि गत जेठमा आयोजना प्रभावित पाँचथर र ताप्लेजुङका स्थानीयबासीका लागि ५ लाख ६० हजार कित्ता आइपीओ जारी गरेर बाँडफाँड समेत गरिसकेको छ ।रैराङले पाँचथर र ताप्लेजुङको सिमा क्षेत्रमा ९.९ मेगावाटको इवाखोला जलविद्युत आयोजना निमार्ण गरेको छ ।
कम्पनीको अधिकृत पुंजी १ अर्ब रहेको छ भने चुक्ता पुंजी ४२ करोड रहेको छ । सर्बसाधारणलाई आईपियो निष्काशनपछि कम्पनीको चुक्ता पुंजी ५६ करोड पुग्ने छ भने संस्थापक र सर्बसाधारणको शेयर स्वामित्व ७५:२५ पुग्ने छ ।