सिटिजन्स बैंक इन्टरनेशनल लिमिटेडले आज साउन १५ गतेदेखि एफपिओ निष्काशन गर्दै छ । बैंकले ९ करोड २७ लाख रुपैयाँ बराबरको ४ लाख ६३ हजार ८२६ कित्ता एफपीओ बिक्रि गर्न लागेको हो। बैंकले एक सय अंकित मुल्यमा प्रिमियम थप गरेर प्रति कित्ता २०० रुपैयाँमा एफपीओ बिक्रि गर्ने छ । बैंकको शेयर निष्काशन तथा बिक्रि प्रबन्धकमा ग्लोबल आइएमई क्यापिटल रहेको छ।
लगानीकर्ता छिटोमा साउन १८ गतेसम्म र त्यस अवधिमा माग अनुसारको आवेदन नपरेमा ढिलोमा भदौ १४ गतेसम्म आवेदन दिन सक्ने छन् । लगानीकर्ताले न्युनतम ५० कित्ता र अधिकतम २३ सय कित्ताको लागि आवेदन दिन सक्ने छन् ।
बैंकको संस्थापक शेयरधनी, संचालक र प्रबन्ध संचालकले एफपीओमा आवेदन दिन पाउने छैनन् । लगानीकर्ताले सम्पूर्ण सीआश्वा सदस्य बैंक तथा वित्तीय स्नास्थाबाट वा मेरोशेयर अनलाइनबाट आवेदन दिन सक्ने छन् ।
एफपीओ बिक्रि तथा वितरण पश्चात बैंकको चुक्ता पुंजी ८ अर्ब ७ करोड पुग्नेछ। एफपीओ बिक्रिबाट बैंकको चुक्ता पुंजीमा ४ करोड ६३ लाख थपिनेछ भने प्रिमियम बापत प्राप्त रकम बैंकको जगेडा कोषमा जम्मा हुनेछ।
संस्थापक र साधारण सेयर अनुपात ५१ः४९ कायम गर्न बैंकले एफपिओ निष्कासनको बिकल्प रोज्नुपरेको हो। हाल बैंकमा संस्थापकको ५१.२९ प्रतिशत तथा साधारण सेयरको ४८.७१ प्रतिशत सेयर अनुपात रहेको छ ।
