नयाँ नेपाल लघुवित्तको हकप्रद भर्ने आज भदौ ३१ गते अन्तिम दिन रहेको छ । कम्पनीले साउन २७ गतेदेखि १:२.५ को अनुपातमा २ सय ५० प्रतिशत हकप्रद निष्काशन गरेको हो । लघुवित्तले प्रतिकित्ता एक सय रुपैयाँ अंकित दरले ६ लाख कित्ता हकप्रद शेयर बिक्री खुला गरेको हो ।
हकप्रद निष्काशनको प्रयोजनार्थ कम्पनीले श्रावण ७ गते एक दिनको लागि सेयर धनी दर्ता किताब बन्द गरेको थियो । साउन ६ गतेसम्म कायम शेयरधनीले मात्र हकप्रद भर्न पाउने छन् ।
कम्पनीको हकप्रदले इक्रा नेपालबाट ग्रेड ५ को रेटिङ पाएको छ जसले कम्पनीको अवस्था कमजोर रहेको जनाउँछ ।
हाल लघुवित्तको चुक्ता पूँजी २ करोड ४० लाख रुपैयाँ रहेको छ । हकप्रद निष्काशन पश्चात लघुवित्तको चुक्ता पूँजी ८ करोड ४० लाख रुपैयाँ पुग्नेछ । कम्पनीको बिक्रि प्रबन्धक एनएमबि क्यापिटल रहेको छ ।