नेपाल क्रेडिट एण्ड कमर्स (एनसिसि) बैंकको हकप्रद भर्ने म्याद थप भएको छ । बैंकले भदौ ४ गतेदेखि १०० बराबर ५० कित्ता अर्थात ५० प्रतिशतका दरले २ अर्ब ३३ करोड ९५ लाख रुपैयाँ बराबरको २ करोड ३३ लाख ९५ हजार २९१ कित्ता हकप्रद बिक्रि खुला गरेको थियो । बैंकले असोज ७ गतेसम्म हकप्रद भर्न सकिने जनाएकोमा १५ दिन म्याद थप गरेको हो । अब लगानीकर्ताले असोज २२ गतेसम्म हकप्रद भर्न सक्ने छन् ।
बैंकले नेपाल राष्ट्र बैंकले तोकेको चुक्ता पुंजी ८ अर्ब पुर्याउने योजना अन्तर्गत हकप्रद बिक्रि गरेको हो । बैंकको शेयर निष्काशन तथा बिक्रि प्रबन्धकमा सनराइज क्यापिटल रहेको छ। साउन १४ गतेसम्म कायम रहेका शेयरधनीले मात्र हकप्रद शेयरका लागि आवेदन दिन पाउनेछन् ।
लगानीकर्ताले बिक्री प्रबन्धक सनराइज क्यापिटल कमलपोखरी तथा एनसीसी बैंकको सम्पूर्ण शाखाहरुबाट आवेदन दिन सक्नेछन् । सी–आस्वामा सहभागी सबै बैंक तथा वित्तीय संस्थाबाट पनि हकप्रद भर्न सकिन्छ ।
पछिल्लो दुई बर्षदेखि साधारणसभा गर्न नसकेको एनसीसीले चुक्ता पुंजी ८ अर्ब पुर्याउन हकप्रदको सहारा लिएपनि हकप्रद निष्काशन पश्चात ७ अर्ब १ करोड चुक्ता पुंजी पुग्नेछ। बाँकी करिब १ अर्ब चुक्ता पुंजी पुर्याउन बैकले बोनस सेयर वितरण वा अन्य बैंक गाभ्ने बिकल्प रोज्न सक्नेछ।
