नेपाल स्टक एक्चेन्ज नेप्सेले कार्तिक अन्तिम साता पूर्ण स्वचालित अनलाइन प्रणाली लागु गर्ने गरी काम तिब्र रुपमा गरिरहेको जनाएको छ । हाल मक ट्रेडिङ गररिहेको नेप्सेले अनलाईन ट्रेडिङको काम अन्तिम चरणमा पुगेको बताएको हो ।
नेप्सेका प्रमुख कार्यकारी अधिकृत चन्द्र सिंह साउदले कार्तिक अन्तिम साताबाट पूर्ण अनलाइन सुरु गर्ने गरी कार्य अगाडी बढिरहेको बताएका हुन् । साउदले मक ट्रेडिङ सुरु गर्दा नै घोषणा गरे अनुसार ६ साता मक ट्रेडिङ चल्ने र त्यस लगत्तै अनलाइन ट्रेडिङ सुरु गर्ने बताए । उनले भने 'टेक्निकल कुरो भएकोले यकिन मिति तोक्न सकिदैन तर अन्य केहि समस्या नआए कार्तिक अन्तिमसाताबाट अनलाइन ट्रेडिङ सुरु गर्ने लक्ष्य छ'।
उनका अनुसार युएटीको रिपोर्ट आईसकेको छ । रिपोर्टलले भने अनुसारको सिस्टममा परिमार्जन गर्ने कार्य पनि भेन्डर कम्पनीले सुरु गरिसकेको उनले बताए । रिपोर्ट अनुसारको परिमार्जनपछि पुन युएटी टेस्ट हुने र त्यसपछि अनलाइन ट्रेडिङ सुरु हुनेछ ।
सीइओ साउदले नेप्से र ब्रोकरबीच हालको लागि डाटा सेन्टर नेप्सेमै राख्ने सहमति भएको पनि बताए । उनले भने 'डाटा सेन्टरको लागि नेप्सेले लोकेशन उपलब्ध गराउने भएको छ, यहि अनुसार ब्रोकरले काम गर्नु पर्नेछ'। सहमति संगै भेन्डर कम्पनी र ब्रोकर एसोसिएसन मिलेर नेप्सेकै भवनमा डाटा सेन्टर राख्ने छन् ।
अन्तिम युएटी टेस्ट भएर धितोपत्र बोर्डले अनुमति दिएसंगै लगानीकर्ताले पूर्ण स्वचालित अनलाइन प्रणाली मार्फत कारोबार गर्न पाउने छन् ।