नेपाल स्टक एक्चेन्जको लगानीकर्ता झुक्याउने क्रम अझै रोकिएको छैन । बिहिबार नेप्से कै चरम लापर्बाहीका कारण लगानीकर्ताहरु अलमलमा परेका छन् । बिहिबार बजार बन्द हुँदा सुरुमा नेप्सेको साइटमा सूचक १३,९९ अंकले घटेको थियो । तर त्यसको केहि समयपछि नेप्से सूचक दोहोरो अंकले घटेको नभई ३.२३ अंकले मात्र घटेको देखायो ।
यसरी नेप्सेले लगानीकर्ता झुक्याएको हो। घटेको अंक फरक देखिएको भए पनि नेप्से सूचक भने एकै देखाएको थियो । यसरी नेप्सेले बजार बन्द भएपछि फरक अंक देखाउदा लगानीकर्ता मात्र नभई संचार मिडिया पनि झुक्किएका छन् ।
नेप्सेमा यस्तो समस्या आएको यो पहिलो पटक भने होइन। यस अघि पनि पटक पटक नेप्सेमा समस्या आउने गरेका छन् । कहिले नेप्सेको साइट नै नचल्ने, कहिले एकदम ढिलो चल्ने त कहिले सूचक गलत देखाउने समस्या लगानीकर्ताले भोग्दै आएका छन् । नेप्सेमा चन्द्र सिंह साउदको आगमन संगै यो क्रम झन् बढेको छ ।
यस क्रममा साउदसंग बुझ्दा उनले आज आफु दिनभर बाहिर रहेको र अहिले शुक्रबार हुन् लागेको प्रादेशिक पुंजीबजार प्रदर्शनीको लागि बिराटनगर जानको लागि विमानस्थलमा रहेकोले यस बारे केहि भन्न नसक्ने तथा केहि जानकारी नभएको बताए ।
उता नेप्सेमा आईटी प्रमुख निरंजन नायकले भने कारोबार सकिएपछि 'end of process' हुने भएको र यसक्रममा डाटा अपडेट हुने भएकोले त्यसबेला केहि तल माथि हुन् सक्ने बताए । यो प्रोसेस ३ बजेर १० मिनेटदेखि कहिँ समयको लागि मात्र चल्ने भएकोले त्यस समय केहि तल माथि भएको हुन् सक्ने बताए ।
