शेयर लगानीकर्ता दबाब समुहले कारोबार बन्दको कार्यक्रम फिर्ता लिएको छ । समुहले सोमबार कारोबार नगर्न भन्दै स्वतः स्फुर्त बजार बन्दको लागि आह्वान गरेको थियो । तर कारोबार बन्दको लागि आह्वान गरिएकै दिन नेप्से सूचक दोहोरो अंकले बढेर ४२ करोड बढीको शेयर किनबेच भएको थियो । लगानीकर्ताहरुले साथ नदिएपछि समुहले बाध्य भएर कारोबार बन्दको कार्यक्रम फिर्ता लिएको हो ।
यद्यपि समुहले भने सरकारले दमनकारी नीति लिएको र आम लगानीकर्ताको हितलाई ध्यानमा राखी संभावित अप्रिय घटना हुनबाट रोक्न कारोबार बन्दको कार्यक्रम फिर्ता लिएको दाबी गरेको छ । दबाब समुहले सोमबारदेखि आमरण अनशन पनि सुरु गरेको छ । दबाब समुहको तर्फबाट हरि ढकाल र तिलक कोइराला आमरण अनशन बसेका छन् । उनिहरुको स्वास्थ्य अवस्था कमजोर हुँदै गएको समुहका अर्का सदस्य दिपेन्द्र अग्रवालले जानकारी दिएका छन ।
दबाब समुहले शान्तिपूर्ण रुपमा ऐक्यबद्ध रहिरहन सम्पूर्ण लगानीकर्ताहरुमा अनुरोध गरेको छ । साथै दबाब समुहले आमरण अनशन शेयरको मूल्य घटाउन र बढाउँन नभएको प्रष्ट पारेको छ ।
