नेपाल स्टक एक्चेन्ज नेप्सेमा माथिल्लो तामाकोशीको शेयर कारोबार सुरु भएको छ । कम्पनीको UPPER सिम्बलमा कारोबार सुरु भएको हो । कम्पनीको सुरुवाती कारोबारको लागि नेप्सेले ७४.८९ देखि २२४.६७ सम्मको रेन्ज तोकिदिएको छ । नेप्सेले सुरुवाती कारोबारको लागि कम्पनीको नेटवर्थको ३ गुणासम्म सुरुवाती मूल्य तोक्ने गरेको छ ।
नेप्सेमा कम्पनीको १० करोड ५९ लाख कित्ता शेय बिहिबार सूचिकृत भएको थियो । कम्पनीले गत साउनमा आयोजना प्रभावित दोलखावासीलाई रु एक अर्ब पाँच करोड र गत कात्तिक १५ देखि १९ गतेसम्म सर्वसाधारणलाई रु एक अर्ब ५८ करोड बराबरको साधारण शेयर बिक्री गरेको थियो ।
यी शेयर लगानीकर्ताको हितग्राही खातामा जम्मा भइसकेको छ । दोलखावासी र आम सर्वसाधारणलाई क्रमशः १० र १५ प्रतिशत शेयर बिक्री गरेको हो । कम्पनीले केही वर्ष पहिले नै कर्मचारी सञ्चयकोषका कर्मचारी, ऋणदाता संस्थाका कर्मचारी, सञ्चयकोषका कर्मचारी, नेपाल विद्युत् प्राधिकरणका कर्मचारीलाई शेयर बिक्री गरेको थियो ।
कम्पनीको आरटिएस सम्बन्धि सेवा सनराइज क्यापिटलबाट हुनेछ । कम्पनीमा ५१ संस्थापक र ४९ प्रतिशत साधारण शेयर रहेको छ । शेयर बजारमा नेपाल टेलिकम पछिको ठूलो मात्राको शेयर कारोबारमा आएको हो ।