शिव श्री हाइड्रोपावरले आयोजना प्रभावित स्थानीयलाई बिक्रि गरेको शेयर बाँडफांड गरेको छ । कम्पनीले पहिलो चरणमा पुस २७ गतेदेखि आयोजना प्रभावित स्थानीयको लागि १४ लाख ७६ हजार ४ सय कित्ता शेयर निष्काशन गरेको थियो । यस निष्काशनमा सिन्धुपाल्चोक जिल्लाका भोटेकोशी गाउँपालिका, बाह्रबिसे नगरपालिका, त्रिपुरा गाउँपालिका र सुनकोशी गाउँपालिकाका स्थानीयले आवेदन दिएका थिए ।
कम्पनीको आईपिओमा ३ लाख ३९ हजार ८ सय ६० कित्ताको लागि मात्र आवेदन परेको र सबै आवेदकलाई माग अनुसार कै शेयर बाँडफांड गरीएको बिक्रि प्रबन्धक सिद्दार्थ क्यापिटलले जनाएको छ । कम्पनीले स्थानीयलाई छुट्याएको मध्ये २३ प्रतिशत शेयर मात्र बिक्रि भएको हो। अब कम्पनीले बिक्रि नभएको ११ लाख ३६ हजार ५ सय ४० कित्ता समेत थपेर सर्वसाधारणलाई ३१ लाख ६० हजार १ सय ४० कित्ता शेयर निष्काशन गर्ने छ ।
कम्पनीले सिन्धुपाल्चोकको चाँखु खोलामा २२.२ मेगावाट क्षमताको जलविद्युत आयोजना निर्माण गरिरहेको छ ।
