गुराँस लाइफ इन्स्योरेन्स Gurans Life Insurance Company Limited ले हकप्रद माथि हकप्रदको भार बोकाएर २ अर्ब चुक्ता पुंजी पुर्याउने भएको छ । कम्पनीको फागुन २३ गते बसेको संचालक समितिको बैठकले ५० प्रतिशतपछि सय प्रतिशत हकप्रद निष्काशन गर्ने प्रस्ताव गरेको हो ।
हाल कम्पनीको चुक्ता पुंजी ५९ करोड ४० लाख रहेको छ । कम्पनीले आर्थिक बर्ष ७३/७४ को मुनाफाबाट ८ प्रतिशत बोनस शेयर वितरण गर्दै छ । बोनस पारित गर्न कम्पनीले चैत्र २१ गते साधारणसभा डाकेको छ । कम्पनीले ५० प्रतिशत हकप्रद निष्काशनको अनुमति पाई सकेको छ । ५० प्रतिशत हकप्रद र ८ प्रतिशत बोनसपछि कम्पनीको चुक्ता पुंजी ९३ करोड ८५ लाख पुग्ने छ ।
त्यसपछि इन्स्योरेन्सले शतप्रतिशत हकप्रद निष्काशन गर्ने प्रस्ताव गरेको हो । शतप्रतिशत हकप्रदपछि कम्पनीको चुक्ता पुंजी १ अर्ब ८७ करोड पुग्ने छ ।
शत प्रतिशत हकप्रद प्रस्ताव कम्पनीको साधारणसभाले पारित गरेपछि, बिमा समितिले स्वीकृत दिएपछि नेपाल धितोपत्र बोर्डबाट अनुमति पाएपछि लगानीकर्तामा वितरण हुने छ ।
कम्पनीले साधारणसभा प्रयोजन र ५० प्रतिशत हकप्रद निष्काशनको लागि चैत्र ६ गते बुक क्लोज गर्ने भएको छ । चैत्र ५ गतेसम्म कायम शेयरधनीले मात्र साधारणसभामा भाग लिन, ८ प्रतिशत बोनस पाउन र ५० प्रतिशत हकप्रद भर्न सक्ने छन् ।