आइतबार नेपाल स्टक एक्चेन्ज नेप्सेमा प्राविधिक समस्या आउँदा लगानीकर्ता कारोबार गर्नबाट बन्चित भएका छन् । आइतबारको कारोबारमा १२ बजेर ४६ मिनेटपछि प्राविधिक समस्या आएको हो । नेप्सेका प्रबक्ता मुराहरी पराजुलीले प्रोटोकल लेयरमा समस्या आएकोले कारोबार प्रभावित भएको बताए । समस्या अझै जारि रहेकोले कारोबार समय थप नगरिएको प्रबक्ता पराजुलीले बताए ।
सिस्टममा समस्या आएपछि आइतबार कारोबार रकम १० करोड पनि पुग्न सकेन । आइतबार १४८ कम्पनीका ३ लाख २२ हजार २ सय ४२ कित्ता शेयर कारोबारबाट ९ करोड ३८ लाख ४२ हजार ८ सय ६१ रुपैयाँको कारोबार भएको छ । सूचक भने ०.९४ अंकले बढेको छ।
आजको कारोबारमा बैंकिंग, होटेल, डेभलपमेन्ट बैंक, जीवनबिमाका परिसूचक बढेका छन् । आजको कारोबारमा नेपाल लाइफको सबै भन्दा धेरै १ करोड २३ लाखको कारोबार भएको छ । आज सानिमा माई हाइड्रोका लगानीकर्ताले सर्बाधिक ४.०२ प्रतिशत कमाएका छन् भने विनाउ विकास बैंकका लगानीकर्ताले सर्बाधिक ५.४८ प्रतिशत गुमाएका छन् ।
