४ वटै लगानीकर्ता संघले संयुक्त रुपमा नेपाल धितोपत्र बोर्डमा विरोध पत्र बुझाएका छन् । शेयरबजारमा लागु भएको भारित औसत लाभकर विषयमा भएको सर्वपक्षीय सहमति लागु गर्न माग गर्दै संघहरुले बोर्डका अध्यक्ष डा. रेवत बहादुर कार्कीलाई विरोध पत्र बुझाएका हुन् ।
विरोध पत्रमा ल्याप्चे आंतकको अन्त्य गर्न माग गरिएको छ भने लगानीकर्तालाई ल्याप्चे नलगाउँन र आवश्यक परे आन्दोलनमा उत्रिन समेत आग्रह गरिएको छ ।
साथै पुँजीबजारलाई पछाडी धक्लेने कार्य कुनै पनि हालतमा स्वीकार गर्न नसकिने भन्दै गैर जिम्मेवार क्रियाकलाप गर्न प्रेरित गर्ने र गराउनेलाई कडा भन्दा कडा कारबाही गर्न र यसबाट परेको नकारात्मक असरको सम्बन्धि पक्षबाट क्षतिपूर्ति भराउन समेत माग गरिएको छ ।
विरोध पत्रमा इनभेस्टर फोरमका अध्यक्ष छोटेलाल रौनियार, शेयर लगानीकर्ता संघका अध्यक्ष उत्तम अर्याल, नेपाल पुँजी बजार लगानीकर्ता संघकि अध्यक्ष राधा पोखरेल, शेयर लगानीकर्ता दबाब समुहका अध्यक्ष हरि ढकाल र नेपाल पुंजीबजार संघकी अध्यक्ष संरक्षणा चौधरीले हस्ताक्षर गरेका छन् ।
गत साता नै कर गणना विधिबारे धितोपत्र बोर्ड, नेप्से, सिडिएस र लगानीकर्ता संघबीच सर्वपक्षीय सहमति भएको थियो । सहमतिमा २०६४ साउन ३० गतेदेखि ०७६ असार ३१ गतेसम्म कारोबार भएका कम्पनीहरुको मूल्यको औसतलाई आधार बनाएर बेस प्राइस निर्धारण गर्ने र सोहिलाई आधार बनाएर भारित औसत गणना गर्ने उल्लेख छ।
यस विषयमा छलफल गर्न अर्थमन्त्रालयले सबै सरोकारवाला पक्षलाई बुधबार बिहान ११ बजे बोलाएको छ।