नेपाल स्टक एक्सचेन्ज नेप्सेका प्रमुख कार्यकारी अधिकृत चन्द्र सिंह साउदले आफुहरुसँग शेयर बढाउने जादुको छडी नभएको बताएका छन् । नेपाल आर्थिक पत्रकार संघ नाफिजको १० औ वार्षिकोत्सव तथा साधारणसभालाई सम्बोधन गर्दै सीइओ साउदले यस्तो बताएका हुन् । जहिले पनि लगानीकर्ताले बजार बढेन , बजार बढेन भन्ने गरेको बताउदै उनले प्रश्न गर्दै भने 'हामीसँग बजार बढाउने जादुको छडी छ र ?' बजार बढाउने र घटाउने लगानीकर्ताको हात मै भएको, माग र आपूर्तिको आधारमा बजार घटबढ हुने बताउदै उनले नेप्से कारोबारको माध्यम मात्र भएको बताए ।
उनले अन्तराष्ट्रिय स्तरको शेयर कारोबारको सिस्टम नेपालले एडजस्ट गर्न नसक्ने पनि दाबी गरे । उनले अन्तर्राष्ट्रिय स्तरको क्यासलेस कारोबारको सिस्टम लगानीकर्ताले चलाउन नसक्ने बताएका हुन् । शेयरबजारको हालको अनलाईन सिस्टम चलाउन पनि लगानीकर्तालाई कठिन भएको बताउदै उनले भने ' अहिले पनि सिस्टम चलाउन केहि लगानीकर्तालाई १२ बजेको छ, यो सत्य हो, धुर्व सत्य हो' । के के भयो भने सिस्टम अन्तर्राष्ट्रिय स्तरको हुन्छ भन्ने प्रश्न गर्दै उनले अहिलेको प्रणाली नेपालको हावापानी सुहाउँदो भएको बताए।
उनले अहिलेको बजारमा पारदर्शिता समेत बढेको बताए । यस अघि लगानीकर्ताले ५० वटा ब्रोकरसँग गरेको कारोबार ५० ठाउँमा देखिने गरेकोमा अहिले ति सबै कारोबार एकै स्थानमा देखिने भएकोले पारदर्शिता बढेको उनले बताए । यस अघि कालोधनको कारोबार हुने तर्फ इंगित गर्दै उनले भने 'कारोबार र इन्डेक्स दुवै घटेको छ, व्हाईट मनीको मात्र कारोबार भएको र ब्ल्याकमनीको कारोबार नभएर इन्डेक्स घटेको हो कि !, यो तर्फ पनि बुझी दिन अनुरोध गर्न चाहन्छु' ।
भारित औसत लाभकरको विवादको विषयमा बोल्दै उनले शेयर खरिद गरेको मूल्य आफैले घोषणा गर्ने नियम नेप्सेको नभई अर्थ मन्त्रालय, अन्तरिक राजश्व विभागको भएको बताए । आफ्नो सम्पतिको मूल्यांकन आफैले गर्ने अन्तर्राष्ट्रिय प्रचलन रहेको समेत उनले स्मरण गराए । उनले मेरो शेयर हुनेले मात्र अहिले अनलाइन मार्फत खरिद मूल्यको स्वघोषणा गर्ने सक्ने र मेरो शेयर नलिएकाहरुले मो शेयर लिनीको बिकल्प नभएको बताए । पुँजीबजार पारदर्शितातर्फ बढेकोले केहि लगानीकर्ता केहि अत्तीएको समेत उनले दाबी गरे ।
उनले बिगतमा डाटा माइग्रेसनको क्रममा सिस्टममा केहि समस्या रहेको स्वीकार गर्दै अहिले भने समस्या समाधान भईसकेको बताए । उनले सुबिसुमा आगलागि भएर इन्टरनेट बन्द हुँदा पनि नेप्सेको सिस्टम चलेन भनेर दोष दिएको भन्दै गुनासो व्यक्त गरे । उनले अनलाइन ट्रेडिङको सिस्टममा कुनै पनि समस्या नरहेको स्पष्ट पारे ।