आइतबार नेपाल स्टक एक्सचेन्ज नेप्सेको वेबसाइटमा 'ट्राफिक' ह्वात्तै बढेको छ । शेयर बजार उकालो लाग्न थालेपछि वेबसाइट हेर्ने आउनेको भिड बढेको हो ।
नेप्सेका आईटी प्रमुख निरन्जन सिंह नायकका अनुसार आज १२ हजारले एकैपटक वेबसाइट भिजिट गरेको बताए । उनले भने ' कारोबार अवधिमा १२ हजारले एकै पटक नेप्सेको वेबसाइटमा क्लिक गरेका छन्' । उनका अनुसार अन्य समयमा एक हजारदेखि १२ सयले एकै पटक नेप्सेको वेबसाइट खोल्ने गरेकोमा आज त्यो संख्या १२ गुणाले बढेको हो । उनका अनुसार आज २ करोड बढी पटक नेप्सेको वेबसाइट भिजिट गरेका छन् । बजार बढेपछि वेबसाइट भिजिट गर्नेको संख्या पनि बढेको हो ।
आज नेपालको पुँजीबजारको इतिहास मै सबैभन्दा बढी रकमको कारोबार भएको छ । आइतबार ३ अर्ब ६० करोड ८५ लाख २६ हजार ३ सय ५४ रुपैयाँ बराबरको कारोबार भएको हो । यस अघिको उच्च कारोबार २ अर्ब ७८ करोड ५० लाख रुपैयाँ थियो । आज नेप्से सूचक ६९.५६ अंक अर्थात् ४.८५ अंकले बढेको छ । यस संगै नेप्से सूचक १५०४.१४ को बिन्दुमा पुगेको छ ।
आज भएको कुल कारोबार मध्ये ४४ प्रतिशत अनलाइन मार्फत भएको नेप्सेले जनाएको छ ।
