नेपाल स्टक एक्सचेन्ज नेप्सेले वोमी लघुवित्तको शेयर मूल्य समायोजन गर्दा त्रुटी भएको स्वीकार गरेको छ । नेप्सेले मूल्य समायोजन गर्दा त्रुटी भएको स्वीकार गर्दै आइतबार र सोमबार भएको सम्पूर्ण कारोबार रद्द गरेको छ भने आजको लागि बाँकि कारोबार स्थगित गरेको छ ।
नेप्सेकी सहायक प्रबक्ता आकृति दंगालले आइतबार र सोमबारको सम्पूर्ण कारोबार रद्द गरिएको र हालको लागि कारोबार स्थगित गरिएको बताएकी हुन् । उनले नेप्सेले मंगलबार पुन: मूल्य समायोजन गर्ने र मंगलबारबाट नियमित कारोबार सुरु हुने बिजपाटीलाई बताईन् । यद्यपि यो समाचार तयार पार्दासम्म नेप्सेले यस बारे औपचारिक सूचना भने दिएको छैन ।
भएको के थियो ?
नेप्सेले शुक्रबार कम्पनीको २५ प्रतिशत बोनसमा मूल्य समायोजन गरेको थियो । समायोजनपछि मूल्य ८५६ तोकिएको र आइतबार सोहि मूल्यबाट कारोबार भएको थियो ।
नेप्सेले २५ प्रतिशतमा बोनस शेयरमा मूल्य समायोजन गरेपनि कम्पनीले घोषणा गरेको लाभांश भने १० प्रतिशत मात्र हो । यस हिसाबमा नेप्सेले १० प्रतिशत बोनसमा मात्र मूल्य समायोजन गर्नु पर्ने थियो ।
कम्पनीका प्रमुख कार्यकारी अधिकृत प्रमेश आचार्यले कम्पनीले हाल कायम चुक्ता पुँजीको १० प्रतिशत बोनस शेयर प्रस्ताव गरेको र त्यहि प्रस्ताव आगामी साधारणसभामा लैजान लागेको बताए । उनले हाल कम्पनीको चुक्ता पुँजी २५ करोड २५ लाख रहेको र त्यसको १० प्रतिशत बोनस प्रस्ताव गरिएको बताए ।
उनले भने 'वितरण गर्न लागिएको कुल बोनस २ करोड ५२ लाख ७२ हजार हो, असार मसान्तसम्म कायम पुँजी १० करोड १० लाखलाई आधार मान्दा यो २५ प्रतिशत बोनस लाभांश हो , हालको पुँजी २५ करोड २५ लाख पुँजीलाई आधार मान्दा यो १० प्रतिशत मात्र हो' । कम्पनीले नेप्सेलाई पठाएको पत्रमा यहि उल्लेख छ।
गत बिहिबार कम्पनीको शेयर मूल्य १,०७० रुपैयाँमा अन्तिम कारोबार भएको थियो । त्यस मूल्यको हिसाबमा कम्पनीको १० प्रतिशत लाभांशलाई आधार मान्दा कम्पनीको समायोजनपछिको शेयर मूल्य ९७२.७२ हुनु पर्ने थियो । तर नेप्सेले २५ प्रतिशतलाई आधार मानेर मूल्य समायोजन गर्दा ८५६ तोकेको थियो, जुन हुनु पर्ने वास्तविक मूल्य भन्दा ११६ रुपैयाँ कम हो ।
यो पनि :
