नेपाल धितोपत्र बोर्डले नेपाल स्टक एक्सचेन्ज नेप्सेलाई पुन: स्पष्टिकरण सोधेको छ । आज आइतबार पनि टिएमएसमा समस्या आएर कारोबार स्थगित भएपछि बोर्डले स्पष्टिकरण सोधेको हो ।
बोर्डका अध्यक्ष भीष्मराज ढुंगानाले नेप्सेमा आएको समस्या के हो, के कारणले आएको हो, यो समस्या आउनुमा जिम्मेवार को हो लगायतका विषयको जवाफ माग गरिएको बिजपाटीलाई बताए । साथै उनले यस्ता समस्या पटक पटक आएकोले यसको स्थायी समाधानको लागि के गर्नु पर्ने हो सो समेत सिफारिस गरि पठाउन भनिएको बताए ।
यस अघि पनि नेप्सेको टिएमएसमा समस्या आउँदा बोर्डले नेप्सेसँग जवाफ माग्ने गरेको थियो । एकपटक नेप्सेले अघिल्लो दिन सिस्टममा केहि सुधार गर्द त्यसको प्रभाव स्वरुप समस्या आएको जवाफ पठाएको अध्यक्ष ढुंगानाले बताए । अर्को पटक ब्रोकर र नेप्सेबीचको लिंकेज बिग्रेर समस्या आएको जवाफ पठाएको उनले बताए । यस पटक समस्याको समाधान समेत सिफारिस गर्न भनिएको उनको भनाई छ ।
यस्ता प्राविधिक समस्याको समाधान नेप्सेले खोज्नु पर्न अध्यक्ष ढुंगानाको भनाई छ । उनले भने ' अहिले आएको समस्या टिएमएसमा हो, टिएमएस नेप्से कै हो, टिएमएसमा आएको समस्या समाधान गर्न के गर्ने भन्ने सम्पूर्ण जिम्मेवारी नेप्से कै हो । '