युनाइटेड इदी मर्दी एण्ड आर.वि. हाइड्रोपावरले निष्काशन गरेको आईपिओमा तेस्रो दिनसम्ममा ८ गुणा बढीको आवेदन परेको छ । कम्पनीको आईपिओमा आज शुक्रबार बेलुकासम्ममा ३ लाख ५४ हजार ५ सय ८१ आवेदकबाट ६६ लाख १२ हजार १ सय ६० कित्ताको लागि आवेदन परेको छ । यो माग भन्दा ८.१३ गुणा बढी हो ।
कम्पनीले मङ्सिर ३ गतेदेखि आईपिओ बिक्रि खुला गरेको छ । कम्पनीले सर्बसाधारणको लागि ८ लाख ७३ हजार ९ सय १० कित्ता शेयर निष्काशन गरेको हो ।
जस मध्ये ४३ हजार ६ सय ९६ कित्ता सामुहिक लगानी कोषहरुलाई र १७ हजार ४ सय ७८ कर्मचारीलाई छुट्याईएको छ । बाँकि रहेको ८ लाख १२ हजार ७ सय ३६ कित्ताको लागि सर्बसाधारणले आवेदन दिन सक्ने छन् । इच्छुक लगानीकर्ताले मसिर ७ गतेसम्म आवेदन दिन सक्ने छन् । शेयर निष्काशनको लागि ग्लोबल आईएमई क्यापिटल बिक्रि प्रबन्धक रहेको छ ।
कम्पनीले यस आयोजना प्रभावित स्थानीयको लागि ४ लाख २० हजार कित्ता आईपिओ निष्काशन गरेकोमा १ लाख ७६ हजार ९० कित्ताको लागि मात्र आवेदन परेको थियो। स्थानीयलाई निष्काशन गर्दा बिक्रि नभएको शेयर समेत जोडेर सर्बसाधारणलाई निष्काशन हुन लागेको हो । कम्पनीका कम्पनी सचिव निरज पौड्यालका अनुसार आयोजना प्रभावित क्षेत्रमा धेरै घरधुरी नरहेकोले कम आवेदन परेको हो ।
हाल कम्पनीको चुक्ता पुँजी ३१ करोड ५० लाख छ । आइपिओ बाँडफाँटपछि सो पुँजी ४२ करोड पुग्ने छ । कम्पनीले कास्कीमा ७ मेगावाट अपर मर्दीखोला हाइड्रोपावर आयोजना निर्माण सम्पन्न गरेको छ । उक्त आयोजनाले १ वर्षदेखि बिजुली उत्पादन गरिरहेको छ ।
