मेगा बैंकले भदौ २७ गतेदेखि हकप्रद निष्काशन गर्ने भएको छ । बैंकले १०:६.५ को अनुपातमा ६५ प्रतिशत हकप्रद निष्काशन गर्न लागेको हो । अब बैंकले २ अर्ब ९७ करोड बराबरको सय रुपियाँ अंकित २ करोड ९७ लाख ८५ हजार ३४ दशमलव ६३ कित्ता हकप्रद निष्काशन गर्ने छ। बैंकले हकप्रद निष्काशनको लागि नबिल इन्भेस्टमेन्ट बैंकिंग लिमिटेडलाई बिक्रि प्रबन्धक चयन गरेको छ ।
लगानीकर्ताले असोज ३० गतेसम्म हकप्रद भर्न सक्ने छन् । बिक्रि प्रबन्धक नबिल इन्भेस्टमेन्ट बैंकिंग लिमिटेडको कार्यालय र मेगा बैंकको सम्पूर्ण कार्यालयबाट हकप्रद भर्न सकिने छ । बैंकले २०७३ माघ ६ गतेसम्म कायम भएका शेयरधनीले मात्र हकप्रद भर्न सक्ने जनाएको छ । साथै गत माघ ९ गतेदेखि कारोबार रोक्का हुँदा नामसारी तथा दाखिल खारेज हुँन बाँकी शेयरधनीले भदौ १६ गतेसम्म प्रकृया पुरा गर्ने शेयर धनीहरुले पनि हकप्रद भर्न सक्ने छन् ।
हकप्रद निष्काशनपछि बैंकको चुक्ता पुंजी ७ अर्ब ५६ करोड पुग्ने छ । बैंकले गत बर्ष ७९ करोड १४ लाख नाफा गरेको थियो भने बैंकको जगेडा कोषमा रहेको एक अर्ब २८ करोड रहेको छ । बैंकले ८ अर्ब चुक्ता पूँजीको लागि नपुग ४३ करोड करोड रकम बोनसबाट पुर्याउने देखिन्छ ।
मेगा बैंक टुरिजम डेभलपमेन्ट बैंक मर्जरको तयारीमा छ । तर मर्जरले गति लिन नसकेपछि मेगाले आफै ८ अर्ब पुर्याउने तयारी गरेको हो ।
