जनरल फाइनान्स लिमिटेडले भदौ २७ गते देखि हकप्रद निष्काशन गर्ने भएको छ । फाइनान्सले १:१.२५ को अनुपातमा १२५ प्रतिशत हकप्रद निष्काशन गर्न लागेको हो । अब फाईनान्सले १६ करोड ५२ लाख बराबरको सय रुपियाँ अंकित १६ लाख ५२ हजार ८ सय ५० कित्ता हकप्रद शेयर निष्काशन गर्ने छ ।
हकप्रद निष्काशन प्रयोजनार्थ फाइनान्सले साउन २६ गते बुक क्लोज गर्ने निर्णय गरेकाले साउन २५ गते सम्म कायम शेयरधनीले हकप्रद भर्न पाउने छन । हकप्रद भर्ने म्याद असोज ३० गते सम्म रहेको छ ।
हकप्रद निष्काशनको लागि ग्लोबल आईएमई क्यापिटल बिक्रि प्रबन्धक रहेको छ । लगानीकर्ताले ग्लोबल आईएमई क्यापिटलको कार्यालय जमल, जनरल फाइनान्सको केन्द्रिय कार्यालय चाबहिल र न्युरोड शाखाबाट आवेदन दिन सक्ने छन् ।
त्यस्तै ग्लोबल आईएमई बैंक लिमिटेडको शाखा कार्यालयहरु आदर्शनगर बिरगंज, सहिद चोक नारायणगढ, पृथ्वी चोक पोखरा, लोकतान्त्रिक चोक बाग्लुंग, त्रिभुवन चोक नेपालगंज र बिपी चोक बुटवल शाखा बाट पनि आवेदन दिन सक्ने छन् ।
इक्रा नेपालले कम्पनिको हकप्रदलाई ग्रेड ५ को रेटिंग प्रदान गरेको छ । अर्थात् कम्पनीको वित्तीय अवस्था औसत भन्दा कमजोर छ ।
कम्पनीले ७३/७४ को आर्थिक बर्षको तेस्रो त्रैमासमा २ करोड ५० लाख घाटा बेहोरेको थियो । कम्पनीको चुक्ता पुंजी १३ करोड २२ लाख रहेको छ भने १२५ प्रतिशत हकप्रद निष्काशनपछि चुक्ता पुंजी २९ करोड ७५ लाख पुग्ने छ ।
