बाँके जिल्लामा घरेलु तथा साना उद्योगमा महिलाहरुको लगानी बढ्दै छ । चालु आर्थिक वर्ष २०७५/७६ को ६ महिनाको अवधिमा १ सय ७८ जना महिलाले उत्पादनदेखि सेवामूलक उद्योग सञ्चालन गर्न विभिन्न फर्महरु दर्ता गरेका छन् ।
महिलाको नाममा फर्म दर्ता गरेर पुरुषले चलाउने गरेको भए पनि पछिल्लो समय स्वयं महिला सक्रिय बन्न थालेका छन् । घरेलु तथा साना उद्योग क्षेत्रमा महिलाको आर्कषण बढेको व्यवसायीहरुले बताएका छन् । जिल्लामा चालु आर्थिक वर्षको ६ महिनामा १ अर्ब २९ लाख ५१ हजार लगानीमा ५५२ उद्योगहरु बाँकेमा भित्रिएका छन् ।
घरेलु तथा साना उद्योग कार्यालय नेपालगञ्जका प्रमुख शिक्षक ऋषिराम पोखरेलका अनुसार चालु आर्थिक वर्षमा उद्योग दर्ता बढेको देखिन्छ । दर्ता भएका अधिकांश उद्योग सञ्चालन भइरहेको पोखरेलले जानकारी दिए । चालु आर्थिक वर्षभित्रै बाँकेमा दर्ता भएका उद्योगबाट १ हजार २२८ जना महिलाले रोजगारी पाएको कार्यालयको तथ्याङ्कले देखाउछ ।
